Alarm te Reali, operohet Isko
Lopetegui qetëson tifozët: Kemi të tjerë që e zëvendësojnë, duam të bëjmë histori
sko Alarkon do të mun gojë në fushat e lojës për afro 1 muaj dhe diçka e tillë ka alarmuar Realin e Madridit. Arsyeja? Operacion në apendicit. Ditën e djeshme, mesfushori spanjoll shfaqi shqetësime në qendrën stërvitore “Valdebebas” dhe u komunikoi mjekëve se nuk ishte në gjendje të stërvitej. Pas analizave u kuptua se Isko kishte probleme me apendicitin dhe duhet t’i nënshtrohej një ndërhyrjeje kirurgjikale. Tani ai duhet të qëndrojë një javë në regjim shtrati për të kërkuar të rikthehet ngadalë nën urdhrat e trajnerit Lopetegui. Por, koha që i duhet është të paktën 1 muaj dhe synimi i Iskos është të arrijë ndeshjen kundër Barcelonës më 28 tetor. Ai do të humbasë disa ndeshje të rëndësishme të Realit dhe të kombëtares spanjolle. Diçka e tillë sigurisht që i shqetëson trajnerët Lopetegui dhe Enrike, pasi Isko ishte një nga më të mirët e momentit.
Lopetegui- Në konferencën për shtyp përpara ndeshjes me Sevijën, trajneri Lopetegui tha se do t’i marrë masat që mungesa e Iskos të mos ndihet në skuadër. “Erdhi me shqetësime dhe mjekët kuptuan që kishte apendicit. Shpresoj që të rikthehet sa më shpejt, por unë nuk jam i shqetësuar sepse kam në ekip lojtarë të tjerë që mund ta zëvendësojnë si duhet”, tha Lopetegui për këtë çështje. Më tej, ai foli për dëshirën për të vazhduar rrugëtimin pozitiv që ka nisur dhe për kartonin e kuq që mori Lenglet i Barcelonës. “Reali i Madridit ka bërë histori dhe epokë në këto vite, por ne duam të vazhdojmë të fitojmë. Kjo është dëshira jonë e madhe, edhe pse nuk është e lehtë. Kemi një ndeshje të vështirë përpara dhe duhet të jemi të përqendruar. Nuk kam frikë aspak nga festa e lojtarëve për çmimet. Lenglet? Nuk ka perfeksion, pavarësisht prezencës së VAR-it. Por duhet të përmirësohet akoma më shumë. Nuk më takon mua të komentoj vendimet e arbitrave”, përfundoi Lopetegui.