“Kampionati është ende i gjatë”

Trajneri i Bajernit, Niko Kovaç, ka qenë shumë i zhgënjyer me rezultatin final të ndeshjes së djeshme ku skuadra e tij nuk shkoi më shumë se një barazim 1-1 ndaj skuadrës së Augsburgut në "Allianz Arena". Kroati kishte paralajmëruar edhe në konferencën për shtyp një ditë para takimit se ndeshja e djeshme do të ishte e vështirë për skuadrën e tij. Kovaç bëri edhe një minirrotacion në skuadër duke lënë jashtë formacionit të parë sulmuesin Robert Levandovski, Tiagon dhe Riberinë. Boateng gjithashtu mungoi pas një dëmtimi të pësuar në stërvitje. Por Niko nuk mendon se ky barazim ishte fundi i botës, pasi sipas tij kampionati sapo ka filluar. "Augsburgu zhvilloi një ndeshje shumë të mirë për gjatë gjithë 90 minutave. Ata nuk na lanë shumë hapësira. Nuk ishte e lehtë të depërtoje në zonën e tyre. Në ato pak raste që kemi hyrë në zonën e tyre kemi gabuar në finalizim", u shpreh trajneri që më pas flet edhe për vazhdimësinë në kampionat të skuadrës së tij. "Kampionati është ende i gjatë dhe skuadrat pak nga pak po rigjejnë formën e tyre, e kam thënë dhe më parë që ky vit do të jetë i ngushtë për sa i përket luftës për titull, nuk do të jetë një shëtitje. Na pret një ndeshje e vështirë në fundjavë. Herta e Berlinit është një kundërshtar shumë i vështirë në fushën e tij. Tabela e renditjes konfirmon fjalët e mia", u shpreh trajneri kroat i Bajernit. Kujtojmë që bavarezët do të luajnë të shtunë një transfertë të vështirë përballë Hertës që renditet në vendin e dytë në tabelën e klasifikimit. Me barazimin e djeshëm kampionët ruajnë ende vendin e parë me 13 pikë, me katër fitore dhe një barazim.