Shkëmbi sfidon Shehin: E mund Skënderbeun
Ish-kapitenët që bënë histori në Korçë, sot në një përballje speciale në Durrës
Dikur ishin liderë të Skënderbeut, ndërsa sot do të jenë në pankinat respektive si kundërshtarë. Bledi Shkëmbi drejton Teutën, ndërsa Orges Shehi, i lindur dhe i formuar si futbollist në Durrës, është sot në krye të pankinës...
Dikur ishin liderë të Skënderbeut, ndërsa sot do të jenë në pankinat respektive si kundërshtarë. Bledi Shkëmbi drejton Teutën, ndërsa Orges Shehi, i lindur dhe i formuar si futbollist në Durrës, është sot në krye të pankinës së Skënderbeut. Një ndeshje speciale për dy ish-lojtarë që bënë historinë në Korçë dhe më pas nisën rrugën e trajningut. Shkëmbin nuk e tremb asgjë para kësaj ndeshjeje, teksa pranon për "Panorama Sport" se është gati për ta thyer Skënderbeun me të besuarit e tij. Pas dy humbjeve radhazi, trajneri i durrsakëve është i bindur se Teuta do të arrijë të fitojë ndaj korçarëve.
Bledi, çfarë do të thotë për ju të keni si kundërshtar skuadrën e zemrës dhe për më tepër njeriun që së bashku nisët të bënit historinë me shiritin e kapitenit te Skënderbeu?
Patjetër është diçka e bukur dhe shumë emocionuese të kem përballë jo vetëm Shehin, por të gjithë ekipin e Skënderbeut dhe qytetin tim. Aty ka shumë persona të veçantë, që së bashku kemi kaluar momente të paharrueshme dhe që do të mbeten gjithmonë në memorien time. Pa dyshim, midis tyre është edhe Orgesi.
Mendoni se e njihni ju më mirë Shehin apo e kundërta?
Mendoj që si trajnerë nuk e njohim njëri-tjetrin, sepse do të jetë hera e parë që përballemi. Do të thosha që kemi të përbashkët dëshirën për të shprehur në fushë një ekip që zhvillon një lojë të bukur dhe sulmuese. Për sa u përket skuadrave, mendoj se secili i ka të qarta idetë për kundërshtarin që ka dhe mënyrën sesi unë apo
Orgesi do të rreshtojmë lojtarët në fushën e lojës.
Pas largimit nga Skënderbeu u fol shumë për kontradikta mes jush dhe Shehit. Si ka qenë e vërteta?
Nuk kam pasur kontradikta me asnjë person dhe aq më pak me Shehin. Kemi derdhur djersë për atë fanellë, kemi arritur suksese që dikur nuk mendoheshin dhe kam vetëm respekt për të gjithë në atë klub.
Është pak ironike që Skënderbeun e drejton një durrsak dhe Teutën një korçar...
Është sa ironike, por aq edhe
e bukur. Futbolli i tillë është si për ne, po ashtu edhe për futbollistët, prandaj është i bukur.
Sot e pranoni edhe një barazim apo mendoni vetëm fitoren?
Mbi të gjitha, ne duam të rikthehemi të zhvillojmë ndeshje të mira dhe të shfaqim po atë
futboll të bukur që na ka munguar javët e fundit. Natyrisht, duam ta shoqërojmë me fitore. E di shumë mirë që në futboll jo gjithmonë fiton ai që luan më mirë apo më bukur, por jemi të përgatitur t'i shkojmë këtij takimi deri në fund dhe ta fitojmë.
Ka diçka që i druheni më tepër përpara kësaj ndeshjeje?
Personalisht nuk i druhem asgjëje para kësaj ndeshjeje, po ashtu as lojtarët e mi. Jemi të vetëdijshëm për vështirësinë e takimit dhe asaj që na pret, por mendoj që kam një ekip, ku pavarësisht rezultateve jo të mira në dy javët e fundit, nuk i trembemi asnjë kundërshtari, kushdo qoftë ai. Kemi punua shumë dhe djersa e djemve do të shpërblehet me rezultate pozitive, duke nisur nga sot.
Sa jua ka prishur planet mungesa e Sidibes në mesfushë?
Mungesa e vetme është pikërisht Sidibe, për shkak të kartonit të kuq në Gjirokastër. Mendoj që nuk do të ndikojë, sepse kemi lojtarë në dispozicion që janë po aq të aftë që të mbushin boshllëkun dhe ta zëvendësojnë pa problem atë. Gjendja e ekipit është e mirë dhe të gjithë jemi me dëshirën për t'u rikthyer te fitorja.