Derbi mbetet i kuq, Partizani tërbon Tiranën
14 ndeshje radhazi pa triumfuar, bardheblutë zhgënjim total
‘ Gega style"... Nuk e kemi fjalën për thek sin anglez të trajnerit të Partizanit dhe as për këngën e famshme "Gangam Style" që u bë hit pak vite më parë. I referohemi stilit me të cilin luan futboll dhe fiton Partizani i Skënder Gegës. Luan thjesht, lufton shumë dhe mbron tmerrësisht ashpër. Cinik dhe dëshpërimisht i padepërtueshëm për kundërshtarët. Fitoi derbin dhe e gdhin në krye. Po, ky është një Partizan ndryshe, që nuk e humb traditën në derbi dhe që marshon pa shumë zhurmë.
Kryeqyteti mbetet i kuq dhe Partizani konfirmohet "mbret" i derbit që riktheu në stadiumi mbi 9 mijë tifozë. Në "Selman Stërmasi" mendoi Esat Mala për të kaluar në delir tifozët dhe për të marrë tri pikë të arta. Ishte një ndeshje që tregoi limitet e dy skuadrave, me "demat" që po bindin gjithnjë e më shumë për të fituar titullin këtë sezon, si dhe nga ana tjetër, bardheblutë një zhgënjim total. Tirana e Ze Marias u eklipsua në mesfushë, aty ku nuk diti të bëjë dot dy pasime bashkë, ndërsa rikonfirmoi se ka një mbrojtje të brishtë, e cila dorëzohet në mënyrën më të thjeshtë të mundshme. Derbi që u mungonte tifozëve prej një sezoni vijon tashmë rekordin me 14 ndeshje radhazi që Partizani nuk thyhet. Për 24 herë kampionët makthi vazhdon dhe fakti që nuk kalon dot pengesën "derbi", goditja është shumë e madhe nga ana psikologjike. 5 pikë në gjashtë ndeshje nuk do të kënaqnin ndoshta as ndonjë skuadër që lufton për mbijetesë, e jo më Tiranën e projektuar për të qenë në majë.
PJESA E PARË
Ze Maria e nisi me Blazhevskin në majë dhe Sentamu e Kobina në mbështetje të maqedonasit. Hasani të jepte përshtypjen e një sulmuesi të maskuar, por që, edhe pse pati shansin për të kaluar në avantazh Tiranën, mbeti krejtësisht në hije. Partizani e fokusoi lojën te katërshja Mala, Bardhi, Asani dhe Mensah, ndërsa Telushi e Hila ishin "digat" para mbrojtjes. Starti është i ekuilibruar dhe bardheblutë kanë shansin të kalojnë në avantazh, por krosimin perfekt të kapitenit Daja
nuk e shfrytëzon dot shkodrani Hasani, që fare afër portës godet jashtë me kokë. "Demat" kundërpërgjigjen me Jasir Asanin, por Ilion Lika i thotë "jo" golit. Gradualisht, të kuqtë zhvendosin lojën, duke mos i dhënë asnjë shans Tiranës sa herë prekte topin.
Mavaje, Hasani dhe Kobina e kanë shumë të vështirë për të nxjerrë skuadrën përpara, ndërsa Doka dhe Daja mundohen të shpikin diçka. Goli i të kuqve vjen pas një krosimi të Asanit në qendër të zonës, aty ku Mala befason bardheblutë me goditjen me të djathtën, që
as Lika nuk ka se çfarë t'i bëjë. Më pas është sërish Partizani që kërkon golin e dytë, por Telushi dhe Trashi nuk kanë shënjestrën e duhur nga goditjet e dënimit. Duhet të kalonin 37 minuta lojë që bardheblutë të krijonin për herë të parë një aksion me të paktën tri pasime të sakta. Doka kombinon me Blazhevskin dhe ky i fundit e dërgon topin te Daja, por goditja e mesfushorit që ka luajtur me të kuqtë dhe tani mban shiritin e kapitenit të Tiranës pritet nga Alban Hoxha.
PJESA E DYTË
Pas pushimit, asgjë nuk ndryshon në vendosje dhe
emra, me trajnerët që besojnë te të njëjtët lojtarë. Por, Ze Maria bëhet shpejt pishman, pasi nuk duron as 10 minuta dhe largon sulmuesin Sentamu. Fillimisht është Lika që eviton golin e dytë pas një goditjeje të Asanit nga jashtë zone. Bardheblutë kërkojnë të shfrytëzojnë shtatlartësinë e Majëkll Ngo, që futet si zëvendësues, por edhe anglezi qëndron shumë larg portës, i detyruar nga manvora e dobët e skuadrës në fazën sulmuese. Janë sërish të kuqtë që kërkojnë golin e dytë me Hilën, por goditja e elbasanasit prek vetëm rrjetën e jashtme. Ze
Maria largon Dokën dhe tenton gjithçka për gjithçka, duke forcuar krahët e sulmit me Oduamadin. Mirëpo, rreziku në portën e Partizanit është zero, pasi Tirana e ka shumë të vështirë të prodhojë aksione goli. Madje, Asani "fal" bardheblutë në dy raste, duke bërë më të vështirën pas inkursioneve në zonë. Në fushë futet edhe Greca për Tiranën, ndërsa Gega largon Mensah dhe Telushi për Koten dhe Hebajn. Afër fundit zëvendësohet edhe Trashi. Minutat kalojnë dhe as ato pesë shtesë nuk prodhojnë gjë. Gjithçka mbyllet me festën e të kuqve.