Trashi: Ze Maria të rishikojë ndeshjen, luajta duke sakrifikuar
“Trajneri ka sjellë kulturë tjetër, raport special jashtë fushe”
Lorenc Trashi sakrifikoi në derbin e djeshëm, pasi gjatë gjithë javës ai ka qenë në dilemë nëse do të ishte në fushë. Këtë gjë ai e pranoi edhe vetë në intervistën e dhënë për “SuperSport”. Trashi u shpreh i kënaqur për suksesin e radhës që Partizani arriti në derbi. Trashi tregoi për frymën e re që ka sjellë trajneri në skuadër, si dhe presidentin Demi. Nuk mund të mungonte një përgjigje për deklaratën e Ze Marias, i cili tha se Partizani e fitoi takimin me një gjuajte në portë.
Sa ju kishte munguar derbi? Të jem realist, na kishte munguar shumë. Çdo tifoz do e donte një derbi të tillë.
A ishte e lehtë për ju që ta fitonit këtë derbi?
Mendoj se nuk ishte shumë e lehtë. Gjatë gjithë javës jemi munduar të japim maksimumin dhe të përqendroheshim te ndeshja me Tiranën. Bëmë diçka ndryshe. Jemi munduar që t’iu fusim frymën e derbit lojtarëve që nuk e kanë luajtur. Rezultoi pozitive.
Ishte Tirana dobët apo ishit ju mirë?
Nuk mund të them që ishte Tirana dobët. E vumë Tiranën në vështirësi, duke e kapur lart me presing. Kjo ishte e gjitha mendoj unë. Në krahasim me vitet e tjera, çfarë mendoni se ka ndryshuar te Partizani?
Unë jam shprehur dhe herët e tjera. Profesor Gega bën një punë shumë të mirë. Nuk e lë ekipin të kalojë në eufori. Ka një marrëdhënie shumë të mirë me lojtarët edhe jashtë fushe. Kjo ka ndikuar shumë. Vjen me një kulturë tjetër. Kjo mendoj është e gjitha.
Shumë i sakrifikuar si mbrojtës. Do i kërkoni Gegës të luani më i avancuar...
Në këtë ndeshje jam sakrifikuar shumë. Kanë qenë 2 ditë të vështira për mua. E kam lënë stërvitjen në gjysmë, kam bërë disa eko. Nuk kam dalë mirë, por këmbëngulja ime ishte për të luajtur.
Sa është premio për këtë fitore?
Sa për premion, presidenti Demi nuk na ka lënë ndonjëherë pas dore.
A jeni dakord me Ze Marian, që e fituat takimin me një gjuajtje në portë?
Nuk e di se çfarë ka parë Ze Maria. Duhet ta shikojë ndeshjen në ritransmetim dhe ta shikojë kush ka bërë një gjuajtje në portë.