Mezani: Mos prisni të luajmë në mbrojtje

Për trajnerin e bluzinjve, Gentian Mezani, Kukësi është kundërshtar për t'u respektuar, pasi në radhët e tij ka lojtarë me eksperiencë. Por, ky fakt, sipas Mezanit s'do të thotë që të tijtë sot në "Elbasan Arena" të shkojnë të dorëzuar. Në konferencën para mediave, Mezani u shpreh optimist dhe besimplotë për marrjen e rezultatit pozitiv ndaj Kukësit më të mirë të viteve të fundit. "Nesër (sot) do të luajmë përballë një kundërshtari të fortë. Kontingjenti i lojtarëve kuksianë meriton vlerësim, por dhe ne kemi një grup futbollistësh të mirë. Jo më kot, Luftëtari i sezonit të fundit siguroi biletën e përfaqësimit në Europë. Fryma e grupit dhe loja kolektive pa dyshim që do të japin rezultatet e kërkuara. Ndaj Kukësit do të jemi të bindur për të marrë më të mirën. Ne do bëjmë lojën tonë dhe ndoshta dhe episodet mund të vendosin siç dhe ndodh në futboll, pasi një gabim i vogël të ndëshkon. Çunat janë të vetëdijshëm për cilësitë e kundërshtarit, ndaj dhe janë stërvitur mirë gjatë gjithë javës", tha fillimisht Mezani.

Strategjia - Luftëtari do të përballet sot me Kukësin në kërkim të ecurisë pozitive pas dy fitoreve të javës së fundit, 3- 1 ndaj Teutës dhe 1- 0 me Vorën, të cilat kanë injektuar më shumë besim dhe optimizëm në radhët e bluzinjve. Pavarësisht se ku do të luhet sfida e sotme, trajneri Mezani e ka të qartë strategjinë me të cilën do të përballojë një kundërshtar si Kukësi. "Nga natyra ime si trajner jam i karakterit të lojës jombrojtëse. Nesër (sot) do të luajmë si në fushën tonë dhe do t'i përgjigjemi kundërshtarit sipas situatave të lojës. Nëse do të mbrohemi, do të bëjmë gabim. Ne do futemi në fushën e lojës për të marrë më të mirën", tha tekniku Mezani. Formacioni - I kushtëzuar nga mungesa e Albano Aleksit të dëmtuar dhe kondicionit jo fort të kënaqshëm të individëve të veçantë, Mezani ka menduar për "arnime" të vogla. Mesfushori Erald Hyseni i dëmtuar lehtë në këmbën e djathtë duket se do të sakrifikojë për të qenë i gatshëm. Mezani, nisur nga vëzhgimi i seancave stërvitore, kryesisht në të djeshmen të zhvilluar në fushën e stadiumit Gjirokastra, pritet t'i besojë 11-shit, me të cilin mposhti Teutën. Tomor Shehu