Përballje elite, Apolonia nën presion

Fierakët do kërkojnë medoemos fitoren, trajneri Miho: Sfidë delikate, duhet shumë kujdes

Dy skuadra me traditë dhe emër në futbollin shqiptar, por që tashmë militojnë në Kategorinë e Parë, vijnë në ballafaqimin e radhës në Grupin B të kompeticionit përkatës: Elbasani, dy herë kampion i Shqipërisë e po kaq i Kupës dhe Apolonia, me një trofe të Kupës së Shqipërisë. Dikur të dyja ekipet kanë lënë gjurmë të pashlyeshme për publikun shqiptar në futbollin elitar të vendit, ndërsa sot garojnë në një kategori inferiore, me aq probleme dhe aspak të përshtatshme për staturën e historikut të këtyre ekipeve. Po në sfondin e historikut, këto dy skuadra janë ndeshur për herë të fundit në Superiore gjatë sezonit 2014-2015, koha e fundit që kanë qenë prezente në këtë eveniment. E megjithatë, publiku i të dyja skuadrave shpreson që këto dy ekipe të rikthehen në mesin e më të mirave, në kohën më të afërt të mundshme. MIHO

Elbasani dhe Apolonia do të luajnë në kuadër të javës IV të Grupit B për Kategorinë e Parë. Në tri javët e para, asnjë prej dy skuadrave nuk ka marrë rezultatet e pritura: Apolonia, e projektuar si pretendente, vetëm 4 pikë nga 9 të mundshme, ndërsa elbasanasit 3 humbje dhe në fund të tabelës. Përtej absurdit tipik "alla shqiptar" që Elbasani dëbohet nga "shtëpia" e vet, se duhet që në "Elbasan Arena" të bujtë një skuadër jabanxhie, ndeshja në Cërrik pritet të ketë rivalitet dhe garë, paçka se së jashtmi kuotohet si favorite Apolonia. Nuk është i këtij mendimi trajneri fierak Marjol Miho. "Është një ndeshje delikate dhe jam i bindur që edhe Elbasani do ta kërkojë fitoren po aq fort sa ne. Renditja është e gënjeshtërt, kampionati sapo ka filluar dhe nuk është kjo gjendja reale e optimale e ekipeve, ndaj dhe duhet të jemi maksimalisht të kujdesshëm me Elbasanin. Kam kërkuar nga lojtarët që të jenë të përqendruar totalisht, të luajnë të çliruar dhe të performojnë në nivelin e pritshmërisë, pasi vetëm kështu fitorja do të jetë e jona", deklaroi Miho. Bujar Rama