“Karleto një mjeshtër, Alegri të shfrytëzojë Ronaldon"

Sfida mes Juventusi dhe Napoli paraqet disa duele shumë interesante në fushë, por edhe në pankinat përkatëse. Marcelo Lipi, në një intervistë për “La Gazzetta dello Sport”, është vënë në rolin e arbitrit. Pikërisht për përballjen mes Maks Alegrit dhe Karlo Ançelotit, tekniku kampion bote me Italinë në vitin 2006 deklaroi: “Nga njëra anë shikoj një skuadër si Juventusi që ka ndryshuar fare pak, sigurisht përveç Ronaldos. Portugezi është një vlerë e shtuar, në një ekip të jashtëzakonshëm e të mbushur me kampionë. Dëgjoj shumë njerëz që pretendojnë se Ronaldo i ka marrë hapësirën Dibalës, por kjo nuk më duket e vërtetë. Alegri e ka konfirmuar vetë që nuk është kështu. Në anën tjetër ndodhet Napoli nuk ka ndryshuar shumë futbollistë. Nuk duhet një ekspert për të dalluar që ekipi është i njëjtë me atë të sezonit të kaluar, por me një trajner të ri që ka bërë një punë fantastike deri më tani. Karleto bëri mirë që mbajti paprekur punën e Sarrit, por i shtoi përvojën e tij, psikologjinë e fortë dhe aftësinë e fortë për të përzierë gjërat me taktikë që do të ndikojnë në paraqitje”.

Portugezi i bardhezinjve ka të gjithë admirimin e Lipit. Si një nga legjendat e stolit bardhezi, trajneri tha ndër të tjera se: “Ronaldo është një kampion, të cilin Zidane e përdori në perfeksion dhe Alegri duhet të mësojë nga kjo. Ai do të ketë sukses dhe të gjithë në ekip duhet ta kenë shembull. Një lojtar i tillë mund të luajë kudo dhe do të përshtatet me të gjithë që luajnë rreth tij”.