Bajerni synon Levandovskin e ri, por Juventusi është në avantazh

Gjashtë gola në pesë ndeshjet e para të kampionatit me Xhenoan (duhet ende të rikuperojnë një takim me Milanin) nuk janë aspak keq për një debutues në Serinë A. Kriztof Piatek në një muaj ka pushtuar jo vetëm faqet e para të medias italiane, por edhe vëmendjen e klubeve të mëdha në Gadishullin Apenin, ndonëse fama e tij ka shkuar deri në Gjermani, ku skuadra e Bajernit të Mynihut ka vendosur që të hidhet në sulm, për atë që shihet si "Robert Levandovski i ri". Dhe ndoshta, Piatek, 23-vjeçar, mund të jetë sposnsorizuar pikërisht nga bashkatdhetari polak dhe shoku i tij i përfaqësueses, që luan për ngjyrat bavareze, sepse të shënosh më shumë sesa Kristiano Ronaldo në Serinë A nuk është diçka që mund ta bëjnë të gjithë. Por pikërisht duke mbetur te Ronaldo, më saktë te skuadra e Juventusit, për të cilin portugezi luan, drejtorët Xhuzepe Marota dhe Fabio Paratiçi kanë kaluar më përpara se Bajerni në kundërsulm për Piatek. "Sportmediaset" nënvizon se që pas ndeshjes së parë, kur Piatek, i paguar 4 milionë euro nga presidenti Preciozi, për t'ia shkëputur KS Krakovias, shënoi dhe nuk u ndal më është vënë në listën e shpenzimeve të Juventusit për verën e ardhshme, duke i garantuar klubit të Xhenoas një shifër prej 20 milionë eurosh për kartonin dhe, pse jo, kuqeblutë mund të kenë edhe luksin që t'ia shesin Juves, por të vazhdojnë ta shfrytëzojnë bomberin polak deri në verën e vitit 2020 në formë huazimi dhe, vetëm më pas, Kriztof Piatek të mund të zbarkojë në Torino. Gjithsesi, nga Gjermania nënvizojnë gjithashtu se Bajerni nuk do të dorëzohet lehtë në këtë sfidë merkatoje me bardhezinjtë.