Hysenagolli: Liga Ballkanike, shkaku i largimit nga Tirana

Skuadra e Teutës është treguar e papërmbajtshme në merkaton e transferimeve të basketbollistëve, ku ka bërë goditje të shumta dhe tashmë shikohet si favoritja kryesore për fitimin e kampionatit që starton në fundjavën e ardhshme. Durrsakët që këtë sezon do të marrin pjesë për herë të parë edhe në Ligën Ballkanike vetëm pak ditë më parë bënë një goditje të dyfishtë në merkato, duke tronditur kampionët e Tiranës, pasi u morën atyre dy lojtarë kryesorë si Endrit Hysenagolli dhe Genti Lasku. Lojtari shtatlartë i qendrës, Hysenagolli, shpjegon arsyet e largimit nga Tirana dhe duket se pjesëmarrja në eventin ballkanik e Teutës ka luajtur një rol të rëndësishëm në këtë vendimmarrje. Për “Panorama Sport” Hysenagolli u shpreh kështu: “Një ndër faktorët kryesorë që ndikuan në vendimmarrjen time për t’u larguar nga Tirana dhe për të firmosur me Teutën është pjesëmarrja në Ligën Ballkanike, pasi kërkoj ende të luaj një nivel disi më të lartë, duke qenë se ky turne është më kompetitiv se kampionati shqiptar. Tirana do të jetë gjithmonë skuadra e zemrës time, pasi aty kam kaluar pjesën më të madhe të karrierës. Tashmë me Teutën do të kërkojmë të bëjmë një paraqitje sa më të mirë në Ligën Ballkanike, pasi është edhe hera e parë që ky klub merr pjesë në këtë event dhe do të kërkojmë që të bëjmë një paraqitje sa më të mirë, sidomos në ndeshjet që do të zhvillojmë para tifozërisë sonë. Sigurisht do të kërkojmë të fitojmë edhe titullin kampion”, deklaroi ish-lojtari i bardhebluve.