Punohet për golin, te Tirana stërviten “me arbitra”
Bardheblutë përgatiten për përballjen me Kastriotin
Pas mbledhjeve të zhvilluara gjatë ditës së djeshme, Tirana ka nisur seancën stërvitore në lidhje me përballjen e radhës. Të mërkurën do të luhet ndaj Kastriotit dhe bardheblutë nuk kanë kohë për të humbur. Trajneri së bashku me ndihmësit e tij kanë drejtuar stërvitjen e djeshme, e cila ka startuar rreth orës 16:20, kur edhe përfundoi mbledhja e stafit teknik me lojtarët.
Përgatitjet - Gjithçka ka nisur me një nxehmje të lehtë me disa vrapime rreth fushës. Më tej, një lojë me disa grupe në kuadrate të vegjël. E njëjta natyrë loje me kuadrat më të madh dhe me rregulla specifike. Gjithçka për të pasur nën kontroll topin dhe që futbollistët të ndërveprojnë mes tyre në situata të ngushta, si dhe të mësohen të dalin nga vështirësia kur kundërshtari ushtron presion, por me pasime të logjikshme dhe të sakta. Goditjet - Goli nuk ka qenë pika më e fortë e bardhebluve në këtë startsezoni në Superiore. Për këtë, gjatë seancës së djeshme stërvitore, trajneri Ze Maria ka vendosur futbollistët në pozicion goditës të kuadratit. Në fillim me disa pasime, ku lojtarët shënjestrojnë kuadratin dhe ndjekin aksionet deri në përfundimin me gol, e më tej edhe me goditje me kokë. Ishte vetë braziliani që "asistonte" dhe lojtarët duhet të finalizonin saktësisht në zonën e vogël. Në fund, pati edhe një minilojë në gjysmën e fushës. Lojë dhe ritëm, si dhe kërkesa maksimale për të gjithë, por në fushë kishte edhe... gjyqtarë. Trajneri Ze Maria u kërkoi asistentëve të tij, përgatitësit atletik dhe përgatitësit të portierëve, që të bënin rolin e arbitrit anësor për të sinjalizuar pozicionin jashtë loje. Sulmuesit dukeshin të zhdërvjellët, mirëpo Majkëll Ngo edhe në stërvitje është parë në vështirësi për golin si pasojë e mungesës së gjatë në fushë prej dëmtimit.