Vllaznia e frikshme, por katër titullarë janë me probleme
Lika mungon në stërvitje, të dëmtuar edhe tre të tjerë
Vllaznia dje i është kthyer punës për takimin e javës së pestë që do të luajë në fushën e vet përballë Veleçikut. Në këtë seancë të parë të këtyre përgatitjeve, tekniku Lika ka pasur disa mungesa për shkak dëmtimesh. Me ekipin dje nuk janë stërvitur katër titullarë. Kapiteni Gilman Lika nuk ka qenë i gatshëm, ndërsa mësohet se janë dëmtuar në përballjen e fundit me Besëlidhjen edhe Alsid Tafili, Arsen Hajdari dhe Antonio Marku. Që të tre kanë qenë lojtarë formacioni në përballjen me Besëlidhjen. Përveç Hajdarit, të tjerët nuk kanë shprehur shqetësime gjatë ndeshjes. Vetëm mesfushori i djathtë është zëvendësuar nga Ruqi në pjesën e dytë. Me sa duket, tërheqja në këmbë është serioze. Po ashtu, edhe Marku dhe Tafili kanë shprehur probleme, të cilat i kanë lënë jashtë fushës së stërvitjes. Megjithatë, dje në stërvitje me ekipin është bashkuar mbrojtësi i djathtë, Olsi Gocaj. Ai ka munguar në takimin me lezhjanët për arsye shëndetësore. Do të shihet në ditët në vazhdim nëse këta lojtarë do të rikuperohen
ose jo.
ECURIA
Deri tani Vllaznia ka bërë një ecuri pozitive në katër javët e para. Skuadra ka arritur që të fitojë të katër ndeshjet ku dy prej tyre i ka zhvilluar në transfertë. Skuadra ka arritur që të shënojë 7 gola
dhe të pësojë vetëm 1. Ajo që bën më shumë përshtypje është se në të katërta ndeshjet, skuadra ka pasur epërsi në lojë ndaj kundërshtarëve. Kjo me sa duket po krijon që tani bindjen se Vllaznia do të ngjitet sërish në elitë në fund të kampionatit.