“Demat” në humor para Teutës, Hebaj dhe Mensah në balotazh
Partizani mbylli dje përgatitjet për Teutën, teksa zgjodhi sërish Elbasanin dhe kompleksin “Pepa” për të kryer seancën e fundit stërvitore. Partizani-Teuta luhet sot në orën 16:45 në “Selman Stërmasi”. Gjatë udhëtimit drejt Elbasanit, të kuqtë kanë mbetur në trafik, për shkak të një proteste në rrugë. Gjatë stërvitjes nuk u vunë re probleme në kampin e kuq, teksa tekniku Gega i pati të gjithë lojtarët të gatshëm për Teutën. Në lidhje me titullarët që mund të hidhen në fushë në këtë përballje, Partizani tanimë e ka marrë një fizionomi të vetën dhe nuk priten ndryshime. Kështu, Hoxha do të mbrojë katërkëndëshin, ndërsa në mbrojtje pritet të luajnë: Ibrahimi, Belica, Atanda dhe Trashi, me Gojkoviçin që qëndron në “nxehmje” për të fituar duelin me nigerianin. Për sa i përket mesit të fushës, nuk ka dilema te katërshja e këtij reparti që deri më tani ka bindur: Hila, Telushi në qendër dhe Asani me Malën nga krahët. Në sulm pritet të jetë Bardhi në majë, i ndihmuar nga njëri mes Hebajt dhe Mensah. Nëse luan shkodrani, Bradhi i bie të luajë pas tij, ndërsa me Mensah nga minuta e parë ai luan “pykë”. Pra, nuk priten surpriza te titullarët, nisur nga ndeshjet e fundit. ATMOSFERA - Ajo që bie në sy te të kuqtë, sidomos pas fitores në derbi, është atmosfera pozitive në skuadër. Lojtarët bëjnë batuta me njëri-tjetrin dhe janë në harmoni. Për ta ngrohur atmosferën mendon edhe vetë stafi teknik, teksa në mungesë të një lojtari për të bërë ushtrimin e kuadratit, në lojë hyn zv.trajneri Dritan Mehmeti, i cili duke përfituar nga mosha e re dhe mundësitë fizike e kreu të plotë pjesën. Kjo tregon edhe atmosferën dhe situatën pozitive që po kalojnë të kuqtë, edhe për faktin se aktualisht janë në krye të renditjes. Vladimir Mema