Luftëtari ndryshon mesfushën, Mezani: Të dënuar për fitoren
Katër mungesa të sigurta, trajneri bluzi: I bindur se do t'ia dalim
Behar Ramadani, Albano Aleksi, Eduard Rroca dhe Ivan Jakovljeviç. Katër mungesa të sigurta për Luftëtarin në ndeshjen e sotme ndaj Kamzës. Nëse Rroca dhe Jakovljeviç kanë pesë muaj që nuk aktivizohen për shkak të dëmtimeve të rënda, Aleksi ishte i radhës që e pësoi dhe mungoi në dy takimet e fundit. Ndërsa, Ramadani është i pezulluar për shkak kartonësh. Në këto kushte, trajneri i Luftëtarit, Gentian Mezani, është i detyruar të ndryshojë mesfushën. Pritet që në rolin e shkatërruesve të luajnë Donald Rapo dhe Oltion Rapa. Ky i fundit do të lërë qendrën e mbrojtjes dhe do të spostohet në mesfushë. Në qendër të prapavijës, krahas Rustem Hoxhës që është i sigurt si titullar, ka një balotazh mes Janiçiç dhe Demos, por serbi duket më i avantazhuar për ta nisur nga fillimi. Për herë të parë, Mezani pritet t'i besojë një fanellë titullari fantazistit beratas, Erald Hyseni. Pjesa tjetër e skuadrës është e njëjtë me atë që u aktivizua ndaj Kukësit.
TRAJNERI - Një fitore ndaj Kamzës do të qetësonte jo pak skuadrën, që ka dy ndeshje radhazi në shtëpi. Në konferencën e zakonshme për mediat, trajneri Mezani theksoi se pavarësisht mungesave, Luftëtari i tij do të arrijë fitoren. "Ndaj Kamzës nuk ka rezultat tjetër, veç fitores. I kemi kundërshtarë direkt dhe duhet t'i mundim. Ata kanë në përbërje lojtarë cilësorë, me aftësi të mira shpërthyese, ndaj duhet të tregohemi të kujdesshëm në çdo moment. Edhe pse kemi pasur pak kohë në dispozicion për të përgatitur këtë ndeshje, lojtarët e mi do të futen në fushë për të dhënë më të mirën. Mungesat? Është mundësia më e mirë për të rinjtë që mund të
aktivizohen si titullarë. Është detyra dhe misioni i tyre për të treguar sa të rëndësishëm janë për skuadrën. Unë shpreh bindjen e plotë dhe besoj se zëvendësuesit e lojtarëve që mungojnë, do të japin gjithçka për të ndihmuar skuadrën në arritjen e fitores, që është dhe
objektivi ynë i vetëm", deklaroi Mezani. Në fund, trajneri vlonjat i kuqezinjve foli edhe për gjykimin. Fakti që Luftëtarit iu mohua një penallti ndaj Kukësit, nuk e bën trajnerin ta paragjykojë arbitrin e sotëm, që është durrsaku Andi Koçi. "Unë nuk kam ndërmend të merrem me gjykimet. Një gjë e tillë s'ka për të ndodhur kurrë në të ardhmen. Edhe pas ndeshjes me Kukësin jam shprehur se arbitri ishte i ri dhe i falen këto gjëra. Ne në fushë do të futemi vetëm për fitore. Mendoj se ne duhet të bëjmë gjithnjë më shumë se kundërshtari. Pra, një gol më shumë për ta fituar këtë ndeshje, pa gjetur justifikime dhe u marrë me arbitrat", përfundoi Mezani, i cili në debutimin në pankinën bluzi arriti një fitore bindëse 3-1 ndaj Teutës në stadiumin "Gjirokastra". Sot në 13:45 është ndeshja e dytë që trajneri drejton skuadrën para tifozëve. Besimi i tij për tri pikë të tjera është i madh, pasi më pas skuadra do të jetë më e lehtësuar, në mënyrë që të përgatisë më së miri sfidën e radhës ndaj Skënderbeut, e parashikuar të luhet të hënën. Sot Luftëtari pritet të ketë një mbështetje më të madhe edhe nga tifozët gjirokastritë. Tomor Shehu