Nga “italiani” Vrioni te "kosovari" Dermaku, katër të rinj
Ndonëse ka kaluar një vit nga ardhja e tij në vendin tonë, trajneri Panuçi vijon që të sjellë të rinj në përfaqësuese. Në grumbullimin e radhës do të jenë katër të tillë. Mes tyre, ka edhe një mbrojtës që në grumbullimin e fundit ishte pjesë e Kosovës, por zgjodhi të largohej.
Kastriot Dermaku - Në Kosovë e prisnin me shumë bujë. I ftuar në grumbullimin e fundit nga Bernard Shaland, mbrojtësi shtatlartë, i lindur dhe rritur në Itali, shihej me shumë perspektivë. Mirëpo, pas ndeshjes në stol me Azerbajxhanin, Dermaku zgjodhi të largohej nga grumbullimi para Ishujve Faroe. Së fundmi, Panuçi i surprizon të gjithë, teksa e përfshin në listë me kuqezinjtë. Një dispozicion do të jetë miqësorja me Jordaninë, por edhe ajo e Ligës së Kombeve ndaj Izraelit për ta testuar, por pse jo edhe për ta "djegur", që të mos ketë më shanse të luajë në tjetër përfaqësuese.
Myrto Uzuni - Goli me skuadrën kroate dhe forma e mirë në vazhdimësi ka bindur trajnerin Panuçi që t'i bëjë një vend në listë. Myrto Uzuni do të debutojë në Kombëtaren e madhe dhe shpresa e të gjithëve është që sulmuesi të shfrytëzojë momentin për të bërë mirë me kuqezinjtë. Pas shpërthimit në Shqipëri dhe vazhdimësisë në Kroaci, është koha që Uzuni të katapultohet në Kombëtare.
Egli Kaja - Në listë është prezantuar si mbrojtës nga FSHF, por në fakt është sulmues anësor dhe i dytë. Pjesë e Livingston në Skoci mbetet për t'u parë nëse do të tregojë se forca në kampionatin ishullor do ta përshtatë shpejt në përfaqësuese apo jo. Xhakomo Vrioni - Pjesë e kombëtareve të moshave deri tek U-19 me Italinë, u bind nga Alban Bushi që të zgjedhë kuqezinjtë. Xhakomo Vrioni debutoi me super gol me Shpresat kuqezi ndaj Italisë dhe kaq ka mjaftuar që të bindë edhe Kristian Panuçin. Një bomber i ri për Kombëtaren do të jetë në dispozicion për dy sfidat e radhës.