Leksion kampionësh, Skënderbeu thyen Kukësin
Bregu revoltohet pas zëvendësimit, refuzon t’i japë dorën Shehit
Skënderbeu likuidon Kukësin dhe "kërcënon" Partizanin. Një gol i Gripshit u ka mjaftuar korçarëve për të marrë një trepikësh të çmuar ndaj një rivali direkt për titullin kampion. Duhet thënë që bardhekuqtë u dhanë "leksion" verilindorëve në këtë 90- minutësh, pasi jo vetëm krijuan volum loje dhe raste, por futën nën trysni edhe kundërshtarin. Skuadra e drejtuar nga Armando Cungu, përtej dëshirës, nuk mundi dot të shfaqej rrezikshëm, aq sa në total e goditi vetëm dy herë portën e mbrojtur nga Teqja.
PJESA E PARË Skënderbeu e nis frikshëm lojën. Korçarët shohin vetëm në sulm dhe në të 7-ën minutë pretendojnë penallti, pas një ndërhyrjeje të Zguros kundrejt Muzakës. Kryesori Kridens Meta nuk sheh faull. E megjithatë, vendësit nuk heqin dorë dhe Bregu për minuta të tëra e bën " autostradë" krahun e djathtë. Në të 13-ën driblon Zguron dhe shërben për Muzakën në zonë, por gjuajtja me kokë e mesfushorit përfundon mbi kuadrat. Një minutë më vonë, Bregu kroson për Oto Xhon, por gjuajtja e nigerianit trondit vetëm traversën. Presingu i skuadrës së Shehit vazhdon dhe në të 17-ën gjen rezultat. Demte merr një top në mesfushë nga Dzaria që humbet kontrollon dhe shërben djathtas për Bregun. Vlonjati është sërish i papërmbajtshëm në krahun e tij, kroson në shtyllën e dytë ku ndodhej Gripshi, i pamarkuar siç duhet nga mbrojtja, zhytet me kokë dhe zhbllokon shifrat në 1- 0. Superioriteti i bardhekuqve vazhdon dhe në të 30-ën fitojnë të drejtën e një penalltie, pas prekjes së topit me dorë të Zguros në një dyluftim me Muzakën. Pas protestave nga verilindorët, në të 32-ën e merr përsipër ekzekutimin vetë Muzaka, por gjuajtja lë për të dëshiruar, shkon shumë mbi tra. Dy minuta më vonë provon Dita me një gjuajtje nga distanca, por "shënjestra" është e gabuar. Pas minutës së 43-të "zgjohet" Kukësi, kur fiton të drejtën e një goditjeje dënimi, por harkimi i topit nga Shkodra kontrollohet prej Teqjes, i cili ruan portën e paprekur për këtë 45-minutësh. PJESA E DYTË
Kukësi e nis ndryshe pjesën e dytë. Armando Cun-
gu lë në dhomat e zhveshjes Zguron dhe fut Ethemin dhe kjo lëvizje ndryshon ritmin. Miqtë shohin më shumë përpara, e megjithatë përpjekjet çalojnë sa në pasin e fundit, aq edhe në finalizim. Skënderbeu bie ndjeshëm, por rastet nuk i mungojnë. Në të 54-ën,
gjuajtja e Bregut në kufijtë e zonës bllokohet nga Frashëri në goditje nga këndi. Kundërpërgjigjet Kukësi me Ethemin, por topi shkon mbi tra. Përpjekjet e miqve intensifikohen, por në të 68-ën Rexhinaldo nuk godet siç duhet me kokë. E njëjta gjë ndodh në të
70-ën, por këtë herë me Shafik protagonist, i cili gjuan tërësisht gabim. Ndeshje e përqendruar në mesfushë për disa minuta dhe në të 76-ën verilindorët ndërtojnë një aksion të rrjedhshëm. Melo driblon dy kundërshtarë dhe kroson në zonë, Shafik ul
topin me kokë për Rexhinaldon, por gjuajtja e afrikanit me të djathtën kontrollohet nga Teqja. Skënderbeu rimerr "frenat" dhe nis të administrojë lojën, sakaq Kukësi has vështirësi që të filtrojë në zonë. Cungu nuk ka çfarë humbet, ndaj mundohet që të shtojë
forcat në sulm, ku aktivizon Harbën dhe largon një fantazist si Shafik. Zhvendoset edhe Shameti në sulm, por më kot, pasi mbrojtja e Skënderbeut ruan më së miri avantazhin dhe blindon vendin e dytë me dy pikë më pak sesa Partizani.