Kamza në presion, Musta: Fiton Flamurtari
Personazhet në seancë dëgjimore, metoda komuniste
Çdo ditë e më shumë, Federata Shqiptare e Futbollit po kthehet në një institucion që u kushton më shumë rëndësi akuzave dhe kritikave që bëhen për të sesa nivelit të futbollit, infrastrukturës, trukimeve, dhunës apo gjyqtarëve që gabojnë thuajse çdo javë. Shpikja më e fundit e FSHF-së është që të intimidojë dhe frikësojë këdo që guxon të kritikojë apo flasë kundër institucionit, drejtuesve të tij apo zyrtarëve të federatës. Në vendimet e djeshme të Komisionit të Disiplinës, dy ishin ato që binin në sy. Në to thuhej se ishin thirrur në seancë dëgjimore zyrtari i Këlcyrës, Robert Spahiu, dhe trajneri i Elbasanit, Elvis Kotorri, dhe sipas Komisionit krejtësisht të “pavarur”, kishin mohuar ato që kishin deklaruar në shtypin e shkruar dhe në rrjetet sociale. Spahiu në prononcimin e tij kishte akuzuar për skenar ndaj Këlcyrës për moszhvillimin e ndeshjes së parë të kampionatit me Tepelenën, ndërsa drejtonte gishtin drejt delegatit. Ndërsa, Kotorri është thirrur për të sqaruar deklaratat e tij pas ndeshjes në Cërrik ndaj Apolonisë që akuzonte gjyqtarët. Metoda të denja për kohën e komunizmit, ku ata që kritikonin apo akuzonin, më pas thirreshin në hetuesi, merreshin në pyetje, frikësoheshin dhe u bëhej presion që të mos e përsërisnin më. Kjo është edhe shpikja më e fundit e federatës, ndërsa për dhunën, trukimet, stadiumet e boshatisura, ekipin simbol të dekadës së fundit të dënuar me 10 vite për trukime ndeshjes apo shumë skandale të tjera, interesohet shumë pak. Vendimet
Ja të gjitha vendimet e djeshme të KD-së: “1. Zyrtari i KF Kamza, Bledar Vashaku, për ofendim të publikut në ndeshje me KF Luftëtari, dënohet me 2 ndeshje pezullim nga aktiviteti. 2. KF Sopoti paralajmërohet se, në rast përsëritjeje të sjellje të
gabuara të spektatoreve, do të jetë subjekt i penaliteteve të Kodit të Disiplinës. 3. Zyrtari i KF Ada, Ylvi Rroj, për sjellje të gabuar ndaj zyrtarit të ndeshjes, dënohet me 8 ndeshje pezullim nga aktivitetet futbollistike. Zyrtarit i ndalohet qëndrimi në stolin e rezervave, dhomat e zhveshjes dhe territorit përreth fushës. 4. Lojtari i KF Këlcyra, Aristidhi Coli, për dhunë ndaj kundërshtarit, dënohet me 6 ndeshje pezullim nga aktiviteti. 5. Lojtari i SSH Përmeti, Stavro Bitika, për sjellje josportive ndaj kundërshtarit dënohet me 2 ndeshje pezullim nga aktiviteti. 6. Lojtari i KF Naftëtari, Erlind Kallmi, për sjellje josportive ndaj kundërshtarit, në bazë të pamjeve filmike, dënohet me 3 ndeshje pezullim nga aktiviteti. 7. KF Korabi U-19, për mosparaqitje në ndeshje kundër KF Shkodra U- 19,
humbet ndeshjen në tavolinë me rezultatin 3- 0. 8. Lojtari i KF Besëlidhja U-19, Armando Gjoka, për dhunë ndaj kundërshtarit, dënohet me 6 ndeshje pezullim nga aktiviteti. 9. Lojtari i KF Kastrioti U-19, Idriz Picorri, për goditje me grusht ndaj zyrtarit të ndeshjes, dënohet me 12 muaj pezullim nga aktiviteti. 10. Lojtari i KF Shkëndija TR U-17, Enri Sulollari, për sjellje josportive ndaj kundërshtarit, dënohet me 2 ndeshje pezullim nga aktiviteti. 11. Lojtari KF Porto U-17, Françesko Daija, për sjellje josportive ndaj kundërshtarit, dënohet me 2 ndeshje pezullim nga aktiviteti. 12. Lojtari i KF Brians U- 17, Arlind Martinaj, për goditje me shkelm ndaj kundërshtarit, dënohet me 6 ndeshje pezullim nga aktiviteti. 13. KF Kamza U-17, për mosparaqitje në ndeshje kundër KF Akademia AAS
U- 17, humbet ndeshjen në tavolinë me rezultatin 3- 0. 14. KF Korabi U-17, për mosparaqitje në ndeshje kundër KF Shkodra U- 17, humbet ndeshjen në tavolinë me rezultatin 3- 0. 15. Pasi zhvilloi seancën dëgjimore me zyrtarin e KF Këlcyra, Robert Spahiu, në lidhje me shkrimet në shtypin e shkruar dhe rrjetet sociale, ai deklaroi moskonfirmimin e tyre si thënie të tij dhe të klubit që përfaqëson, shkak për të cilin do të bëjë edhe përgënjeshtrimin përkatës. 16. Pasi zhvilloi seancën dëgjimore me zyrtarin e KF Elbasani, Elvis Kotorri, në lidhje me shkrimet në shtypin e shkruar, ai deklaroi moskonfirmimin e tyre si thënie të tij dhe të klubit që përfaqëson, shkak për të cilin do të bëjë edhe përgënjeshtrimin përkatës”, ishin vendimet e djeshme të Komisionit të Disiplinës.