Mezani tregon si ia dilet ndaj Skënderbeut
"Përballë Skënderbeut s'do ta kemi aspak të lehtë. Luajmë me skuadrën kampione dhe na duhet të jemi shumë të motivuar dhe të përqendruar në çdo situatë të lojës. Kundërshtari ka pasur oshilacione, por mbetet pa dyshim ekipi më i mirë i Superiores", u shpreh për "Panorama Sport" trajneri Gentian Mezani. Për të ecur me hapin pozitiv të arritur ndaj një kundërshtari hermetik në mbrojtje si Kamza, trajneri i Luftëtarit i druhet jo pak Skënderbeut, i cili në Gjirokastër do të synojë pa diskutim fitoren. Për të përmbushur objektivin e synuar nga presidenti Tavo pas humbjes me Kukësin, trajneri Mezani tregohet i kujdesshëm në deklarimin e tij. "Unë besoj te të gjithë lojtarët që kam në skuadër. Futbollistëve do t'u kërkoja vetëm një gjë, angazhim total dhe mosnënvlerësim të asnjë situate loje. Që të marrësh rezultat pozitiv, kërkohet vullnet dhe shpirt gare, pavarësisht potencialit të kundërshtarit", përfundoi Mezani. Të ndërgjegjshëm për rëndësinë e takimit të nesërm, futbollistët bluzi, nën drejtimin e dyshes Mezani-Paskualeti, vijuan dje përgatitjet në fushën sportive "Lefter Millo" të fshatit Dervician. Të vetmit lojtarë që mungonin në seancën e djeshme stërvitore ishin dy "xhevahirët" e mesfushës, Eduart Rroca dhe Albano Aleksi, të cilët vijojnë të diferencuar. Pas këtij takimi, Rroca dhe Aleksi do të bashkohen me grupin për të nisur përgatitjet me top për të qenë të gatshëm për takimin e fundit të fazës së parë, atë me Partizanin. Në sfidën e nesërme, trajneri Mezani do të ketë të gatshëm edhe kapitenin Ramadani, që e ka shlyer pezullimin. Rikthimi i shkodranit në mesfushë e bën edhe më të fortë "digën" para mbrojtjes. Për Mezanin do të thotë një mundësi më shumë për të përzgjedhur partnerin e kapitenit. Paraqitja pozitive e dyshes Hoxha-Janiçiç në ndeshjen e fundit pritet të sjellë një lëvizje të re në mesfushë. Mbetet për t'u parë nëse Mezani do të formojë duetin RamadaniRrapa apo Ramadani-Rapo. T. Shehu