Tirana fiton derbin me Kamzën në frymën e fundit
Karaj me një 3-pikësh u dhuron fitoren bardhebluve
Tirana arrin të marrë një fitore me shumë vuajtje në ndeshjen debutuese në kampionatin 20182019 të basketbollit për meshkuj. Bardheblutë, që vijnë në këtë edicion mes shumë problemesh financiare dhe kanë pasur largime të shumta nga skuadra, djersitën shumë për të marrë fitoren në javën e parë të kampionatit. Kamza me disa afrime të rëndësishme në merkato, ku ka marrë dy lojtarët e Teutës, Çelën dhe Uruçin, e vendosi në pozitë të vështirë Tiranën pasi kryesoi thuajse gjatë gjithë takimit, për t’u dorëzuar vetëm në sekondat e fundit pas një 3-pikëshi të realizuar nga Karaj. Në ndeshjen debutuese të sezonit 2018-2019, bardheblutë nuk kishin në dispozicion as uniforma dhe zbritën në parket me fanella të bardha, të cilat ishin pa numër dhe pa logo, gjë që tregon sezonin e vështirë që pritet të kalojnë 20 herë kampionët e vendit.
Ndeshja - nis më mirë për skuadrën e Kamzës, e cila tregohet më e saktë, ndërkohë që bardheblutë duken të paqartë në lojën e tyre. Kamza realizon pikët e para dhe krijon një epërsi prej 10 pikësh duke kryesuar me rezultatin 10-6. Kjo diferencë nuk ndryshon deri në fund të periodës së parë që mbyllet me shifrat 22-12 për kamzalinjtë. Tirana vazhdon të shfaqë probleme në organizimin e lojës së saj edhe gjatë periodës së dytë, ku gabon shumë dhe nuk ia del dot të ngushtojë diferencën e pikëve, duke shkuar në pushimin ndërmjet dy pjesëve me disavantazhin 31-45. Pas pushimit, kampionët futen më të karikuar në parket dhe fillojnë ta shfaqin epërsinë e tyre duke triumfuar në periodën e tretë 20-15 dhe duke e reduktuar diferencën e pikëve në 51-60. Në fraksionin e fundit të lojës, bardheblutë shpërthejnë dhe arrijnë ta vendosin rezultatin në ekuilibër. Në sekondat se fundit të ndeshjes është Erkand Karaj, i cili me një 3-pikësh u jep fitoren bardhebluve me rezultatin 76-74.