Alaveshi zhyt në krizë Realin, thyen Benzema dhe Bejl
Dëmtohen dy sulmuesit, “galaktikët” 4 ndeshje pa fitore
Reali, zyrtarisht në krizë. Madrilenët jo vetëm që kanë harruar të shënojnë, por tani kanë filluar edhe të humbasin. Në “Vitoria” kundër Alaveshit përfundoi 1-0 për vendësit pas një goli me kokë në minutën e 95-të, të shënuar nga Manu Garsia. Një humbje që Reali nuk e kishte provuar që prej vitit 1931. Skuadra e Lopeteguit ka vetëm 1 pikë në tri ndeshjet e fundit: ka humbur me Sevijen, Alaveshin dhe ka barazuar me Atletikon. Në mes, edhe humbja në Moskë kundër CSKA-së në Champions. Reali ka 409 minuta pa shënuar gol, afërsisht 7 orë lojë. Vetëm 2 herë në historinë 116vjeçare të lavdishme të Realit ka arritur 4 ndeshje pa shënuar gol. Lopetegui bëhet trajneri i tretë në listën e zezë.
Jashtë Asensio- Lopetegui provoi të ndryshonte diçka, por lëvizjet nuk ishin të duhurat. Ashtu si ndaj Romës, la në stol Asension duke luajtur me skemën 4- 4- 2 ( Sebajos dhe Modriç nga krahët dhe Kasemiro-Kros në qendër dhe Bejl Benzema në sulm). Ky i fundit nuk shënonte prej 6 ndeshjes dhe dje kapi të shtatën. Pati vetëm një rast me
kokë në pjesën e parë dhe e humbi. Lopetegui e zëvendësoi në fundin e pjesës së parë, duke aktivizuar Marianon (i dëmtuar).
Pak raste- Në pjesën e dytë, Mariano kishte dëshirë dhe këmbëngulje për të ndryshuar fatin e ndeshjes, por vetëm kaq
nuk mjaftonte. Lopetegui provon me Asension për Kasemiron. Shumë zotërim topi, por asnjë rast për “galaktikët”. Alaveshi ishte i vendosur mirë, teksa dielli i kishte lënë vendin një shiu të rrëmbyeshëm. Xhoni kishte rast të artë, por e goditi jashtë kuadratit të portës së mbrojtur nga Kurtua.
Bejl dhe goli- Çerek ore përpara fundit të ndeshjes, Bejl kërkoi zëvendësimin. Uellsiani nuk ishte rikuperuar mirë nga dëmtimi në derbi. Një tjetër shqetësim për Realin. Përpara se të zëvendësohej bën një goditje, por pa rrezik. Në vendin e tij i riu Vinicuis, i cili nuk pati forcë për të ndryshuar lojën. Diçka të tillë e bën Manu Garsia në frymën e fundit, kur devijon një top me kokë drejt rrjetës dhe me këtë fitore e rendit Alaveshin krah Realit në krye të klasifikimit. Fytyra e Perezit në tribunë është një dëshmi e qartë e krizës. PSG - LION