Nga ferri në parajsë, Murinjo shpëton pankinën

"Po më përndjekin, nuk u vura pistoletën në kokë për kontratën"

Nga ferri, në parajsë. Zhoze Murinjo konfirmohet edhe një herë trajneri i një mijë jetëve. Dhe ai e nis me një shfryrje tjetër: "Një miku im po më thoshte në mëngjes, se nëse nesër bie shi në Londër, është faji im. Nëse ka mosmarrëveshje për akordin e 'Brexit', është faji im. Unë duhet të jem gati për të gjithë këtë. Shoh shumë dashakeqësi dhe përndjekje në futboll. Kjo është jeta që unë dashuroj dhe që kur kam qenë fëmijë kam punuar për këtë. Unë jam 55 vjeç dhe është hera e parë që shoh një njeri të përndiqet. Unë arrij ta përballoj. Por disa nga djemtë, pavarësisht se nuk janë ata të përndjekurit, nuk po e përballojnë dot. Kjo është një gjë e re dhe mua më shërben, sepse më bën trajner dhe njeri më të mirë. E kuptoj që gjërat në natyrën njerëzore dhe në industrinë ku unë punoj sot kanë ndryshuar. Unë e dashuroja këtë punë, e dashuroj ende, por tani është ndryshe. Megjithatë, jam i rritur dhe do arrij ta përballoj. Mënyrën se si e nisëm ndeshjen, lojtarët ishin në panik në çdo top në zonë, sa mendova se do shënonim një autogol. Rashford ishte i trishtuar, ndërsa MekTominej i trembur në fushë". Pastaj portugezi komenton përmbysjen: "Nuk ishin zëvendësimet, ishte mentaliteti dhe dëshira. Siç e kam thënë edhe më parë, askush nuk është më i rëndësishëm, vetëm klubi. Nuk bëhet fjalë as për mua dhe as për lojtarët. Në pjesën e dytë lojtarët dhanë gjithçka, nuk kishin ç'të jepnin më. Jam i lumtur për tifozët dhe lojtarët. Ata mund të kthehen në shtëpi me ndjesinë e fitores. Jam i mrekulluar nga reagimi i tyre. Por nuk e dua atë mbështetje. Nëse do të kisha mundësi t'u thosha të mos e bënin, do ta bëja sepse nuk bëhet fjalë për mua, por për klubin që ata dashurojnë dhe e përfaqësojnë me nder dhe dinjitet". Në fund, dhe një batutë për shkarkimin: "Ata më ofruan një kontratë deri më korrik 2020. Unë kam një kontratë deri atëherë dhe nuk jam unë ai që u vura pistoletën në kokë. Ata ma ofruan, sepse donin ta bënin".