Ramadani “firmos” edhe për 1 pikë, Mezani: Pres fitoren ndaj korçarëve
Luftëtari i karikuar, kapiteni: Skënderbeu i fortë, por do ta ndalim
Luftëtari është gati për fitoren e dytë radhazi në shtëpi. Këtë herë si kundërshtarë janë kampionët në fuqi, por gjirokastritët e kanë treguar edhe sezonin e kaluar, duke e mundur Skënderbeun edhe kur ishte i mbushur me yje. Në konferencën e zakonshme për shtyp para ndeshjes, trajneri i gjirokastritëve, Gentjan Mezani, vlerësoi maksimalisht potencialin e kundërshtarit, por nga ana tjetër, shprehu bindjen e tij për një rezultat pozitiv. "Mezi pres ndeshjen me Skënderbeun, pasi më duhet të shoh forcën dhe besimin që kam te lojtarët e mi. Skënderbeu është ekipi më i mirë i vendit, të cilin e vlerësojmë dhe e respektojmë për gjithçka që ka arritur vitet e fundit. Rikthimi i kapiten Ramadanit është një forcë më shumë dhe na jep siguri në mesfushë. Pas ndeshjes me Skënderbeun presim rikthimin e Rrocës, ndërsa për Aleksin do të duhet edhe pak kohë për të qenë i gatshëm. Gjithsesi, jemi të fokusuar te ndeshja me Skënderbeun dhe besoj se do t'ia dalim për të marrë më të mirën. Luftëtari mund të fitojë ndaj çdo kundërshtari. Pas ndeshjes me Kamzën, skuadra ka një moral tjetër dhe ka treguar se ka forcë për të arritur te fitorja", është shprehur kreu i pankinës bluzi
në daljen para mediave. KAPITENI - Kapiteni i Luftëtarit, Behar Ramadani, pasi shleu pezullimin për kartonë, është i gatshëm sot për trajnerin Mezani. Një ditë para takimit me Skënderbeun, mesfushori shkodran foli për "Panorama Sport", duke theksuar se Luftëtari nuk i druhet kundërshtarit. "Skënderbeut nuk i druhemi, pavarësisht se në organikë ka lojtarë cilësorë, duke filluar nga ish-shoku ynë i skuadrës, Dejvi Bregu. Thuhet dhe flitet se Skënderbeu nuk është skuadra e sezonit të kaluar, por unë nuk jam i këtij mendimi, pasi ata sërish luajnë futboll të bukur. Qëllimi ynë i vetëm në këtë takim është të mos dalim pa pikë, por kjo nuk na imponon për të mos synuar rezultatin maksimal. Në fushë do të jemi të përqendruar për të marrë qoftë edhe me një pikë. Fitorja do të ishte më e mira e mundshme, por të shpresojmë", ka thënë fillimisht Ramadani. Lidhur me mungesat e disa lojtarëve titullarë në këtë periudhë dhe ndikimin që kanë pasur në rezultatet e ekipit, kapiteni u shpreh: "Te Luftëtari të gjithë kanë vendin e duhur për atë çfarë japin në fushë. Mezi presim rikthimin e Rrocës, Aleksit dhe Jakovljeviçit. Me këta futbollistë do të rritet niveli i lojës sonë". Tomor Shehu