Egnatia ngjitet në krye, Tomori dorëzohet në fund

Beratasit mbeten në krizë, dy golat e Brajt nuk mjaftojnë

Egnatia nuk fal në sh tëpi, mund Tomorin dhe ngjitet në krye të Grupit B e vetme. Sfida e djeshme që u luajt në "Hasan Zyla" u mbyll me fitoren e rrogozhinasve në shifrat 3-2. Pas humbjes së pësuar një javë më parë në Pogradec, dje të besuarit e Vladimir Gjonajt treguan se janë një skuadër, e cila nuk dorëzohet lehtë cilido qoftë kundërshtari. Rrogozhinasit vinin ndaj Tomorit me dy mungesa të rëndësishme si Ibrahimllari dhe Korreshi, që nuk ia dolën të jenë në dispozicion për shkak dëmtimesh. Por, megjithatë lëvizjet skematike të stafit për të plotësuar boshllëqet rezultuan efikase. Golat për Egnatian u shënuan nga sulmuesi Branica, që u zhbllokua pas disa javësh dhe gjeti dy herë rrjetën dhe vulosi gjithçka Karakaçi dy minuta para fundit. NDESHJA Rrogozhinasit e nisin sfidën direkt e në sulm pasi zbritën në fushë. Loja e mirë duket se do të shpërblehet si duhet. Nuk vonon shumë dhe në minutën e 20-të është sulmuesi Branica që gjen rrugën e rrjetës, duke zhbllokuar shifrat. Pas një topi të marrë nga një kombinim perfekt në mesfushë, peqinasi futet brenda zonës dhe i vetëm përballë Kaloshit, nuk e ka të vështirë të shënojë. Miqtë arrijnë të barazojnë pas 14 minutash me nigerianin Brajt, që shënon me kokë pas një krosimi nga goditja e këndit. Egnatia duket se nuk pajtohet lehtë dhe hidhet në sulm dhe kalon sërish në avantazh në minutën e 43-të. Pas një krosimi nga e djathta, është Branica që godet saktë me kokë. Pjesa e dytë do të ketë panoramë tjetër, me rrogozhinasit që dalin më rrallë në sulm dhe nga ana tjetër Tomori i jep përparësi vijës së parë. Beratasit barazojnë përsëri rezultatin po me Brajtin, që shënon dopietë. Ishte minuta e 79-të dhe nigeriani ashtu si te goli i parë përfiton pas krosimit të ardhur nga goditja e këndit dhe me kokë nuk e ka të vështirë për ta barazuar. Minutat në vazhdim, Tomori ushtron presion dhe kërkon golin e fitores, të cilin e gjen vetëm në minutën e 88-të. Është Karakaçi pas një goditjeje të fortë brenda zonës, që nuk i lë mundësi reagimi gardianit Kaloshi dhe realizon golin e tretë. Vendësit e ruajnë avantazhin deri në fund.