Skandal trukimesh, vihet në pranga trajneri në Belgjikë
Pastrim parash, korrupsion, trukime, ndalohen edhe arbitra
Shpërthen një rast “calciopoli” në Bel gjikë. Bëhet fjalë për një seri bastisjesh nga policia në 12 prej klubeve të “Jupiler Pro League”, elitës së futbollit belg. Mes këtyre janë emrat e Genkut, Anderlehtit, Bryzhit dhe Stanard Liezhit. Bëhet fjalë për një skandal të vërtetë si “calciopoli” i famshëm italian, ku prokuroria ka ngritur akuzën për riciklim parash dhe korrupsion. Me kërkesë të gjykatësit të çështjes, 13 bastisje nga 44 në total janë kryer jashtë vendi (mes vendeve të përfshira janë Franca, Luksemburgu, Qipro, Mali i Zi, Serbia dhe Maqedonia). Zyra e Prokurorit njoftoi se hetimet kanë nisur prej më shumë se një viti në lidhje me operacione financiare të dyshimta të menaxherëve të futbollistëve, që akuzohen se kanë fshehur komisionet e paguara, duke bërë evazion fiskal.
Seri arrestimesh – Sipas burimeve të hetimit, një prej figurave më të rëndësishme të arrestuar të mërkurën është trajneri kroat i kampionëve të Klub Bryzhit, Ivan Leko, i ndaluar direkt në shtëpi. Presidenti i klubit, Bart Verhaege, tha: “Ne nuk kemi asgjë për të fshehur. U dhamë të dhënat për të verifikuar kontratat dhe faturat dhe në fund do të dalë gjithçka se ishte e rregullt dhe e pastër”. Mes personave të ndaluar janë edhe Herman Van Holsbek, ish-drejtuesi i Anderlehtit dhe arbitrat Bart Vertenten dhe Sebastien Delferier. Agjentët Dejan
Veljkoviç dhe Mogi Bajat (i konsideruar numri 1 në Belgjikë), edhe këta të arrestuar, janë në qendër të këtij operacioni të koduar me emrin “Duart e Pastra”. Hetimi ka vendosur nën lente edhe disa ndeshje të dyshuara si të trukuara gjatë sezonit 2017-2018.
Federata belge – “Është një rast shqetësues për imazhin e futbollit belg”. Në këtë mënyrë e komentoi hetimin federata belge, KBVB. “Jemi në pritje të rezultateve të hetimeve dhe dëshmive të të marrve në pyetje”, tha zëdhënësi Pierr Kornez.