Thirret Lilaj, blof me Balliun
Vjen mesfushori korçar, ndërsa mbrojtësi s’lejohet nga klubi i Metz. Zbardhen porositë e Panuçit
Lëvizje të papritura në Kombëtare para ndeshjes me Izraelin. Pas problemeve fizike që shfaqën në miqësoren ndaj Jordanisë, kanë lënë dje grumbullimin mbrojtësi Frederik Veseli dhe mesfushori Ylber Ramadani, të cilët do të vazhdojnë fazën riaftësuese në klubet e tyre, duke mos qenë të gatshëm për Kombëtaren. Me urgjencë trajneri Kristian Panuçi ka menduar që të zëvendësojë mungesat e tyre me mbrojtësin Ivan Balliu që luan te Metz dhe mesfushorin korçar, Sabjen Lilaj, i cili aktivizohet në Azerbajxhan te Qabala. Mirëpo, nëse për këtë të fundit gjithçka ishte OK dhe iu bashkua Kombëtares dje në mbrëmje, e kundërta ndodhi me Balliun. Ka qenë vetë FSHF, që sqaroi situatën e mbrojtësit përmes një njoftimi në faqen zyrtare. “Balliu nuk mund të jetë në dispozicion të Kombëtares, pasi trajneri i Metzit ka kërkuar që mbrojtësi të mos largohet, duke qenë se i duhet ta ketë në stërvitje për të përgatitur takimin e radhës në kampionat. Sipas argumentimit të dhënë, trajnerit të Metz i janë larguar 8 lojtarë në ekipet Kombëtare dhe kështu ka vendosur që Balliun ta ketë me grupin e mbetur. Zëvendësimi i paparashikuar për shkak të dëmtimeve të lojtarëve në miqësoren me Jordaninë, si dhe ftesa karshi klubit dërguar së fundmi dhe jo si çdo ftesë 14 dite përpara grumbullimit, ka bërë që trajneri të mos i japë leje. Balliu nuk do të zëvendësohet me askënd tjetër”, citohej ndër të tjera në njoftimin e institucionit të futbollit. STËRVITJA
DHE POROSITË
“Besim dhe vetëm besim”. Kjo është motoja e kuqezinjve në përballjen decizive që do të zhvillohet nesër në Izrael. Panuçi ka në dispozicion dhe në gjendje të mirë fizike dhe psikologjike të gjithë grupin. Ai e di fort mirë se çfarë do të thotë kjo përballje, ndaj dhe ka marrë të gjitha masat për të mos u zënë në befasi nga vendësit. Italiani ka kërkuar vëmendje maksimale, qetësi, vendosmëri, dinakëri dhe kujdes nga të tijtë. “E dimë të gjithë sa e rëndësishme është kjo ndeshje për ne. Jemi të vetëdijshëm për vështirësitë, por tri pikë nuk është mision i pamundur. Nëse bëjmë atë që kemi bërë në stërvitje dhe kemi diskutuar, gjithçka do të bëhet më e lehtë për të arritur këtë objektiv. Izraeli ka lojtarë dinakë që mund të provokojnë, kërkojnë goditje dënimi apo penallti, ndaj duhet të jemi 100 për qind të koncentruar dhe vigjilent me qëllim mos të biem pre e tyre. Futemi në fushë dhe japim më të mirën. Kam besim te gjithsecili prej jush”, mësohet t’u ketë thënë Panuçi lojtarëve në seancën e djeshme. Shqipëria do të zbresë në fushë me formacionin më të mirë të mundshëm, duke iu rikthyer skemës klasike 4-5-1, me një mesfushë të ngjeshur.