“Mjaft me dështime, kthesa e Kastriotit vjen ndaj Kukësit”
Pas një lëndimi në kavilje, Dajan Shehi gradualisht po rimerr veten dhe në sfidën ndaj Kukësit pritet që të jetë në fushë. Në një prononcim për “Panorama Sport”, Shehi flet për lëndimin e tij, ecurinë e deritanishme të skuadrës, si edhe për vazhdimësinë, duke vënë theksin te ndeshja e radhës. Sipas tij, ndaj Kukësit do të jetë ndeshja që do të vijë kthesa te rezultatet pozitive. “Vij nga një lëndim në kavilje dhe tani kam filluar stërvitjen normale. Shpresoj dhe kam besim se deri në ndeshjen ndaj Kukësit do të jem 100%. Rezultatet e deritanishme të skuadrës kanë ndikuar shumë në gjendjen psikologjike të ekipit, por besoj se periudha e mjaftueshme që kemi në dispozicion do të na shërbejë shumë për të ‘prishur mallkimin’ e këtyre javëve të para. Jemi ndëshkuar nga mungesa e eksperiencës, e cila na ka penalizuar, pasi dihet që jemi një ekip me pak lojtarë me përvojë në Superiore dhe me shumë djem të rinj. Megjithatë, duhet pranuar se veç kalendarit, edhe fati na ka munguar në këto tetë javët e para të kampionatit. Ndeshja e radhës ndaj Kukësit mendoj se është shumë e vështirë, pasi të gjithë i dimë kualitetet që ka kundërshtari. Pavarësisht kësaj, ne do të futemi në fushë vetëm për fitore, pasi nuk kemi rrugë tjetër. Asnjë rezultat tjetër përveç tri pikëve nuk na largon zona e rrezikut. Për ne nuk ka ndeshje të lehta, të gjitha janë finale dhe vetëm fitorja do të na mbajë afër rivalëve që kemi për mbijetesë. Ndaj, duke filluar nga ndeshja e radhës, nuk na lejohet më që të gabojmë, pasi çdo pikë e lënë na e vështirëson realizimin e objektivit që është qëndrimi në Superiore. Edhe në Fushë- Krujë kemi pasur mbështetje dhe jemi ndier si në shtëpinë tonë. Mungesa e tifozëve ultras, por edhe moszhvillimi i ndeshjeve në Krujë na kanë penalizuar paksa. Por, jam i bindur se nga kjo ndeshje ka për të filluar kthesa jonë, çka do të sjellë rezultatet pozitive dhe tifozërinë tonë në stadium, të cilëve duhet t’u kërkojmë ndjesë për arritjet zhgënjyese të këtyre javëve të para”, deklaroi Shehi. Bujar Balliu