Apolonia bën llogaritë, Nako jep recetën e ndryshimit
Fierakët nuk kanë marrë pikët që prisnin në këto javë
Ka kaluar më shumë se gjysma e fazës së parë dhe fierakët kanë grumbulluar vetëm 8 pikë në 5 ndeshje, nga 15 të mundshme - larg asaj që kanë pretenduar pa filluar sezoni. Megjithatë, vetëm Egnatia dhe Pogradeci e shohin nga lart renditjen e Grupit B të Kategorisë së Parë: kryesuesit rrogozhinas +2 pikë nga Apolonia, ndërsa liqenorët vetëm 1 pikë më shumë. Ja pse sfida e radhës mes Pogradecit dhe Apolonisë është shumë interesante, edhe për vetë ecurinë dhe pozicionimin e tyre momental në renditje. Rudin Nako është një nga "shtyllat" e forta të kësaj Apolonie, një nga elementët më të rëndësishëm dhe që krijon siguri e qetësi në prapavijën bardhejeshile. E karakterizon maturiteti edhe në vlerësimin e ecurisë së ekipit, teksa shprehet: "Mendoj se kemi vijueshmëri përgjithësisht të mirë gjer tani, pasi problematika e fillimit të sezonit me formatimin, përshtatjen dhe kolaudimin e skuadrës janë të njohura. Po vetëm 2 pikë jemi larg vendit të parë. Duhet të kishim bërë më mirë gjatë këtyre 5 javëve? Them se po, por i kemi mundësitë e plota të përmirësojmë shumë gjëra, sepse jemi aty ku duhet fizikisht dhe teknikisht e ndaj besojmë se do të dalim shpejt atje ku meritojmë të jemi". Qendërmbrojtësi i Apolonisë nuk e sheh si trysni të papërballueshme objektivin për në Superligë të skuadrës, përkundrazi, mendon të kundërtën. "Nuk është se na presionon statusi i pretendentes dhe nuk ndihemi as të brishtë e as të frustruar nga pritshmëritë. Përkundrazi, një objektiv i qartë për ne është stimul, na motivon dhe ne nuk i kemi besuar vetes diçka të pamundshme në fillim të sezonit". Bujar Rama