Spanja, Enrike një “magjistar”
Nga De Gea tek Albiol pa harruar Suson dhe Alkaserin, sa shumë risi te Spanja
Nuk duhet shumë vëmendje për të kuptuar që Luis Enrike ka bërë shumë gjëra të mira dhe pozitive që nga momenti kur mori drejtimin e kombëtares së Spanjës. Më e rëndësishmja: Rikuperoi idenë që ishte krijuar se kjo skuadër kishte 6 vite në krizë. Gjithashtu, riktheu skuadrën te fitoret, edhe pse nuk bëhet fjalë për një kompeticion të rëndësishëm. Fitoret në ndeshjet zyrtare me Anglinë, goleada me Kroacinë dhe një tjetër rezultat bindës me Uellsin në transfertë sigurisht që vlejnë. Trajneri i ri i Spanjës duket se e ka bërë skuadrën të harrojë dështimin në Botëror dhe mbi të gjitha ka rikthyer besimin te lojtarët, gjithçka si me magji. Arriti t'i jepte besim një lojtari shumë të rëndësishëm si David De Gea, ai që në Botëror u kritikua dhe u masakrua. Por Enrike gjithashtu ka rikthyer lojtarë të harruar si Bartra dhe Albiol, po ashtu edhe Sebajosin. Për më tepër ingranoi në ekip Pako Alkaserin, i cili prej 2 vitesh nuk luante në kombëtare.
TË RIKTHYERIT- David De Gea pësoi 91.6% të goditjeve që iu bënë në Botëror. Ai priti vetëm një goditje nga 12 në kuadrat. Ai shihej si fajtori kryesor për dështimin e Spanjës në Botëror, aq sa nisi të qarkullonte emri i Kasijasit
për një rikthim të mundshëm. Tani, pas 3 muajsh, De Gea është sërish një garanci. Në tri ndeshje ka pësuar vetëm një gol dhe në Londër bëri pritje spektakolare. Po ashtu edhe me Kroacinë. Por edhe në mbrojtje, trajneri Enrike ka merita të jashtëzakonshme. Raul Albiol nuk luante me Spanjën që nga 31 marsi i vitit 2015 (humbja me Holandën), por trajneri vendosi t'i japë besim. Kundër Uellsit luajti si titullar dhe bëri një ndeshje të mirë. Është 33 vjeç dhe luajti ndeshjen e 52-të me Spanjën. Duket se nuk do të jetë e fundit. Po ashtu edhe Bartra po
fillon të ketë një rol protagonisti në këtë skuadër.
ALKASER- Luis Enrike kërkon të freskojë mesfushën e kombëtares dhe e di që diçka e tillë bëhet duke pasur në ekip emra të rinj. Njëri prej tyre është Dani Sebajos, i cili me Zidanin nuk pati shumë minuta, por tani po fillon të luajë edhe Realin. Sulmuesi Pako Alkaser është një temë më vete. Ai nuk llogaritej fare nga trajnerët e mëparshëm, mbi të gjitha për faktin se me Barcelonën nuk kishte një ecuri pozitive (15 gola në 50 ndeshje, 1 në çdo 152 minuta). Ndeshja e tij e fundit me Spanjën ishte në 27
mars 2016. Enrike, i cili nuk e aktivizoi shumë me Barcelonën, përfitoi nga momenti i tij i mirë me Dortmundin dhe e aktivizoi. Ai ia shpërbleu besimin me 2 gola në fitoren ndaj Uellsit. Pa harruar aktivizimin e Susos, i cili duket një element i rëndësishëm për kombëtaren e Spanjës dhe emra të tjerë të rinj që do të ndihmojnë "Furinë e Kuqe" për të pasur një rrugëtim pozitiv. Luis Enrike është një "magjistar". Duket se presidenti i federatës, Luis Rubiales, ka goditur në shenjë me emërimin e tij në krye të kombëtares së Spanjës. Fillimi duket shumë i mirë.