Nejmar frymëzon Brazilin, Zhezus e Sandro dënojnë Arabinë
"Seleçao" fiton, por kursehet në miqësore
Më shumë sesa një provë e vërtetë, "Seleçao" bën një stërvitje luksi përballë Arabisë Saudite, në pritje të klasikes me Argjentinën, të ditës së martë. Brazili fiton lehtësisht ndaj të zotëve të shtëpisë, madje kursehet vetëm me një fitore 2-0, me dy gola të realizuar në ekstremet e të dyja pjesëve të lojës. Sigurisht që duke parë diferencën teknike mes të dyja skuadrave, ndoshta në fushë pritej diçka më shumë nga "banda" e drejtuar nga trajneri Tite, por në fund mund të mjaftojë edhe kaq, duke qenë se për 96 minuta me radhë, tifozët e pranishëm në stadium mundën që të shijonin klasin e Nejmarit me shokë, me yllin e PSGsë, i cili vërtet nuk shënoi, por diti
që të frymëzojë dhe të lërë gjurmën personale, në të dy golat e kombëtares së tij. Në stadiumin "King Saud University", në Rijad, Brazili merr që në fillim kontrollin e lojës, por nuk i jep asaj ritmin e shpejtë që pritej, diçka e kuptueshme duke qenë se është e kotë që në një miqësore të shpenzohen energji të kota apo aq më
shumë dëmtime. Gjithsesi, klasi dhe finesa nuk mungojnë, ndonëse për të parë golin e parë të pesë herë kampionëve të botës duhet të pritet minuta e 44-t, kur Nejmar i dhuron një asist Gabriel Zhezusit të lëshuar në zonë dhe sulmuesi i Mançester Sitit nuk gabon. Në pjesën e dytë, Brazili vazhdon me dominimin e tij, por sërish nuk është shumë efikas përpara portës. Sigurisht që rastet nuk mungojnë, por golat nuk vijnë. Madje, në episodin më të pastër, atë të minutës së 85-të, Riçarlison gjendet i vetëm përballë portierit saudit, por Al Ovais i dalë jashtë zonës i mohon golin, duke frenuar aksionin me dorë. Kartoni i kuq për të është i pashmangshëm, edhe pas konsultimit me sistemin "VAR". Me një lojtar më shumë, Brazili shtyn diçka më tepër në minutat e fundit (u akorduan 6 minuta shtesë) dhe pikërisht në të fundit, juventini Aleks Sandro dërgon shifrat në 2-0, pasi devijon saktë me kokë brenda rrëmujës së zonës, pasimin e Nejmarit nga goditja e këndit.