Po shkëlqen në Ukrainë, Demiri: Prisja një ftesë
Besir Demiri, mbrojtësi me origjinë shqiptare, i cili aktivizohet tek ukrainasit e Mariupolit, flet në një prononcim për Lajm TV për faktin që nuk ka marrë një ftesë nga trajneri Panuçi. Kujtojmë që vetëm javën e kaluar, që u bë edhe publikimi i listës për dy ndeshjet e tetorit, mbrojtësi i majtë u përfshi në formacionin e javës në Ukrainë. NDESHJA NDAJ JORDANISË "Nuk mund të rri pa e parë Shqipërinë, qoftë edhe miqësore. Ishte ndeshje e fortë, pasi kundërshtarët që në fillim ishin agresivë, por rezultati 0-0 është zhgënjim, pasi duhej fitorja për besim para Izraelit. Normale që pas çdo rezultati negativ, nuk e ke atë vetëbesim dhe atë që planifikon". PA FTESË "Të them të drejtën, unë çdo herë jam i gatshëm për Kombëtaren, asnjëherë nuk zhgënjehem apo të dorëzohem. Këto janë zgjedhje të Panuçit. Shpresoj që Shqipëria të vazhdojë me rezultate pozitive. Nuk mund ta them se pse nuk kam marrë një ftesë, pasi i takon trajnerit të zgjedhë dhe e respektoj". EKSPERIMENTE TË PANUÇIT? "Shqipëria është në një kohë tranzicioni dhe trajneri kërkon zgjedhje sa më të mira për të zëvendësuar ata lojtarë që bënë historinë me kualifikimin në Europian”. GRUMBULLIM "Nuk mund të them që ndonjë futbollist bojkotonte Panuçin, pasi të gjithë i respektojnë vendimet e tij. Unë kisha shumë emocione, që nga dita e parë e grumbullimit deri te dita e fundit që kishim ndeshjen. Emocione të mëdha ditën e ndeshjes me Izraelin dhe aty ishin kulmet e emocioneve". DALLIMI TE HIMNI? "Unë kam prezantuar edhe Maqedoninë, por grumbullimi i parë nuk barazohet me të gjithë grumbullimet me Maqedoninë. Është një ndjenjë që nuk mund ta them me një fjalë. Fanella kuqezi është shumë e rëndë, do e mbaj gjithmonë me përgjegjësi".