Biragi-gol, Italia shkëlqen në Poloni
Dy traversat dhe pritjet e Sheznit shmangën goleadën
talia i shpëton zbritjes nga kategoria ( nga Liga A), madje ka ende një mundësi që të luajë edhe për gjysmëfinalet e Ligës së Kombeve. Një ndeshje e dominuar dhe e luajtur në mënyrë spektakolare, por e zgjidhur vetëm në minutën e 92-të, me një gol të Biragit, kjo për “faj” të pritjeve fantastike të Sheznit dhe pasaktësisë së disa prej “axurrëve” përpara portës polake. Dje, ndoshta ishte shkëndija më e madhe që shpërtheu, ajo e duhura, sepse “tiki-taka” e Mançinit bind dhe u pëlqen shumë vetë lojtarëve që e interpretojnë. Dhe ndoshta, nëse gjendet atje përpara edhe njeriu-gol, Italia mund të nisë që të frikësojë sërish.
Çfarë starti - Mançini konfirmoi skuadrën anti-Ukrainë, me trion Bernardeski-KiezaInsinje në sulm, por këtë herë “9 fals” e bënte juventini. Ndërsa, polakët zgjedhin dyshen Levandovski-Milik përpara, me bomberin e Serisë A, Piatek, në stol. Pjesa e parë luhet me një portë, një dominim italian i frikshëm, i cili bën që 0-0 i 45 minutave të para të jetë i pashpjegueshëm: dy traversa dhe tri pritje madhështore të Sheznit. “Banda” e Mançinit përvetëson topin, bën shumë lart presing dhe godet me breshëri. Duheshin vetëm pak minuta që Zhorzhinjo me të djathtë të tronditë traversën, ndërsa në të 23-ën, Kieza shërben Bernardeskin që shpërdoron në mënyrë të frikshme nga pozicioni ideal. Sërish Kieza, terrori i mbrojtjes rivale, driblon si birila këdo që i del përpara dhe pason për Insinjen në qendër të zonës, por edhe sulmuesi i Napolit, në rrëshqitje e sipër ndalet nga traversa. Gjithsesi, nëse nuk do të ishte për juventinin Shezni, Polonia do të ishte mbytur: pritje monstruoze ndaj një diagonaleje me të djathtë nga Zhorzhinjo; ndal goditjen me kokë të Kielinit në trekëndësh dhe frenon me trup “silurin” e Florencit, nga pak centimetra.
Biragi... - Polonia bën dy zëvendësime që në fillim të pjesës së dytë dhe nis të mbrohet, ndonëse është Donaruma që ndal i pari Grosiçkin. Gjithsesi, Italia reagon menjëherë, me Kiezën që thërret gol, por topi devijohet në goditje këndi, pas një devijimi përpara portës. Në minutën e 65-të, vjen goli italian, me të kaltrit që ndërtojnë një aksion të denjë të “Barcelonës së Guardiolës”, por pasimi i fundit gjen në pozicion jashtë loje Insinjen.
Në të 71-ën, shpërdoron sërish Bernardeski, me kokë, pas një pasimi të Kiezës pas shpatullave të mbrojtjes. Italia e lëshuar e gjitha në sulm i falet edhe Donarumës, që grushton sërish ndaj Grosiçkit, një gol gjysmë të bërë, por në minutën e 92-të vjen goli i shpëtimit:
goditje këndi nga e djathta për Lazanjën që nga shtylla e parë devijon topin me kokë në të dytën, ku mbrojtësi Biragi në rrëshqitje depoziton në rrjetë. Një fitore më shumë sesa e merituar dhe mbi të gjitha, më në fund, një Itali që pa dhe transmetoi dritë...