Devolli: Ja ku gabon Tomori
"Pësojmë shumë gola nga goditjet standarde, lojtarët janë nën presion"
Tomori nuk po kalon një moment të mirë në këtë fillimsezoni, pasi në 5 javët e para të Kategorisë së Parë, ka arritur të sigurojë vetëm 5 pikë në tabelën e klasifikimit. Skuadra e trajnerit Bledar Devolli kishte 3 barazime dhe 1 fitore në 4 ndeshjet e kaluara dhe kur pritej një reagim pozitiv, Tomori humbi me rezultatin 3- 2 në transfertë ndaj Egnatias. Ndonëse flitet për një krizë rezultatesh në radhët e beratasve, tekniku Bledar Devolli nuk e mendon aspak këtë gjë. Pavarësisht rezultateve negative, ish- trajneri i Kamzës mendon se situata nuk është aq dramatike sa flitet dhe se fitoret do të vijnë shumë shpejt.
DEVOLLI
Në një prononcim për "Panorama Sport", trajneri i Tomorit u shpreh qartë mbi situatën. "Tomori i ka bërë të qarta objektivat që në fillim të kampionatit dhe tanimë është normale që të ketë kritika. Në futboll ka gjithmonë
momente të mira dhe të këqija. Do të rregullojmë gabimet që kemi bërë në këto javë dhe besojmë se gjithçka do të shkojë në rrugën e duhur përgjatë këtij kampionati. Situata nuk është dramatike. Ajo që u kam përcjellë vazhdimisht
lojtarëve është të përmirësohemi në të dyja fazat e lojës, duke qarkulluar topin dhe t'i bëjmë gjërat drejt, ashtu sikurse përgatitemi. Po ashtu, edhe në fazën mbrojtëse nuk duhet t'i japim kundërshtarit asnjë mundësi për gol. Duhet të evitojmë golat nga goditjet standarde, pasi jemi ndëshkuar në shumë raste dhe kjo na ka sjellë dëme. Të shënosh dy gola në Rrogozhinë dhe të dalësh pa pikë kjo është e pafalshme. Megjithatë, të gjitha këto gabime bien mbi mua, pasi jam unë ideatori i lojës dhe ai që bëj taktikën. Duhet të dalim me patjetër nga kjo situatë, duke filluar që nga kjo javë, sepse koha po kalon dhe duhet të rikuperojmë pikët e humbura. Çalojmë në disa pika, por e shpreh me bindje që deri në janar do të grumbullojmë pikë mjaftueshëm dhe pastaj do të bëjmë përforcimet në skuadër", u shpreh fillimisht Devolli. Me tej, tekniku gjirokastrit foli mbi presionin që rëndon te lojtarët. "Besoj se objektivi për t'u ngjitur medoemos në Kategorinë Superiore ndikon te lojtarët, pasi e konsiderojnë si presion tejet të lartë. Megjithatë, unë jam i mendimit se ndeshjet duhet t'i marrim njëra pas tjetrës dhe më pas të bëjmë llogaritë në muajt janar dhe maj. Unë kam ardhur këtu për të bërë më të mirën dhe kam besim se në fund do të buzëqesh", përfundoi prononcimin e tij Devolli.