FSHF ultimatum Tiranës, Muzaka: Ja e vërteta
“Gjithçka në rregull te Skënderbeu, Takaj më korrekt se kurrë”
Ultimatum 30-ditor për Tiranën nga ana e Federatës Shqiptare të Futbollit. Klubi bardheblu duhet të paguajë dy këstet e mbetura ndaj futbollistit të Skënderbeut, Gjergji Muzaka, nëse nuk ka dëshirë të dënohet dhe t'i hiqen pikët. Ishte Komisioni i Disiplinës në vendimmarrjen e djeshme që njoftoi Tiranën se ka për detyrë që brenda 30 ditëve të shlyejë rreth 71 milionë lekë të vjetër, detyrim nga një vendim i Dhomës Kombëtare të Zgjidhjes së Konflikteve. Komisioni i ka dhënë faktikisht një ultimatum ekipit bardheblu, i cili ka shkelur marrëveshjen me Gjergji Muzakën dhe në këto kushte duhet të nxjerrë paratë nga xhepi. Një situatë e vështirë për Tiranën, e cila çështjen Muzaka ka dy vite që e vuan, duke u endur nëpër dyert e gjykatës dhe faqet e gazetave, por pa i dhënë një zgjidhje përfundimtare, e cila këtë herë mund të rezultojë shkatërrimtare.
MARRËVESHJA - Pas polemikave, dy ultimatumeve të tjera të federatës dhe lëshi- meve të të dyja palëve, Muzaka dhe Tirana ranë dakord dhe më 19 qershor në llogarinë e lojtarit u depozituan afro 35.6 milionë lekë të vjetër. Detyrimi që shkon në 107 milionë lekë do të mbyllej me tri këste të barabarta. Kryeqytetasit pranuan propozimin e
bërë prej kohësh prej ish-mesfushorit, i cili u bind që borxhi të paguhej me pjesë. Duke qenë se kësti i parë u likuidua, tashmë bardhebluve nuk u mbetej që tjetër, veçse të jepnin edhe dy "hiset" e tjera. Kësti i dytë do të jepej në fund të shtatorit-fillimtetorit, ndërsa kësti i tretë do të paguhej deri në fund të vitit 2018. Gjithsesi, Tirana nuk ia ka dalë të paguajë këstin e dytë ndaj lojtarit dhe Gjergji Muzaka është ankuar sërish në Disiplinë, e cila tani detyron Tiranën të paguajë 70 milionë lekët e vjetër sipas marrëveshjes. Sipas kontratës së firmosur asokohe, dy pjesët e tjera të ndara me nga 35.6 milionë lekë (të vjetër gjithnjë) do të jepeshin deri në fund të këtij viti kalendarik, por Tirana e shkeli marrëveshjen me Muzakën dhe tani rrezikon heqjen e pikëve, por ndoshta edhe më keq, zbritjen në Kategorinë e Parë. Gjithsesi, bardheblutë kanë 30 ditë kohë për të zgjidhur "çështjen" Muzaka, sepse në të kundërt, heqja e pikëve do të ishte fatale për bardheblutë. Dhe këtu nuk llogarisim zbritjen një kategori më poshtë, e cila sigurisht nuk ka gjasa të ndodhë.