Barazimet janë bërë makth, Lushnja bëhet gati për festë
Bejte dhe Xhafa, të bindur për fitore ndaj Bylisit
Egnatia është e para, ndaj Lushnja dhe Bylisi (- 3) pritet të luftojnë fort pasditen e nesërme në stadiumin “Roza Haxhiu”. Bëhet fjalë për dy skuadra që kanë rivalizuar deri në fund në dy edicionet e fundit për në Superiore. Në kampin verdhejeshil ëndërrojnë fitoren. “Veteranët” e Lushnjës flasin për një ndeshje që duhet fituar. XHAFA
Qendërmbrojtësi Erjon Xhafa për gazetën “Panorama Sport” shprehet se ekipi verdhejeshil ushqen shpresa të mëdha për tri pikë, pas një kalvari të gjatë barazimesh. “Jemi të përgatitur që në ndeshjen e së shtunës të jemi gati për të realizuar objektivin, që është vetëm fitorja. Është një ndeshje e vështirë, ndaj një kundërshtari relativisht të fortë. Shpresojmë dhe urojmë që fitorja të jetë e jona. Shpresojmë të rikthehemi te fitorja pas tri barazimeve radhazi. Kjo do të na ndihmojë për renditjen, pasi edhe kundërshtarët tanë aty- aty janë. Nuk ka ndonjë diferencë të madhe. Shpresojmë të arrijmë objektivin dhe t’i dhurojmë publikut tonë një gëzim akoma më të madh. Tifozët tanë e presin këtë fitore dhe shpresojmë shumë se do t’ia arrijmë”, u shpreh “veterani” i mbrojtjes verdhejeshile. Një tjetër “veteran”, portieri Ibrahim Bejte, thotë për gazetën se eksperienca e madhe e Lushnjës në të tilla ndeshje do t’i ndihmojë verdhejeshilët.
BEJTE
“Nuk ka ndeshje të lehta, sidomos në grupin tonë, ku të gjitha ndeshjet janë të vështira. Bylisi është një rival i drejtpërdrejtë për ne. Një kundërshtar që e njohim shumë mirë. Jemi stërvitur mirë dhe pretendimet tona për këtë ndeshje janë të mëdha. Shpresojmë që duke thënë 100% në këtë ndeshje, të na ndihmojë dhe pak fati. Besoj se Lushnja do të dijë të dalë me sukses nga të tilla përballje. Si nga fillimi i lojës deri në fund të jemi të gjithë të përqendruar. Besoj se do të dalim me sukses. Fitoret të dërgojnë më lart në renditje. Shpresojmë të mos bëjmë hap fals si me Turbinën. Të japim më të mirën dhe të arrijmë fitoren”, u shpreh portieri Bejte. Alban Alushi