Pereira: Mou llogari Pogbasë për videon, ishte keqkuptim
Mesfushori i Junajtid zbulon prapaskenat e sherrit
Shkaku u bë ajo video. Dhe në atë moment dolën në sipërfaqe marrëdhëniet e tensionuara mes Pol Pogbasë dhe Zhoze Murinjos. Më 25 shtator, Mançester Junajtid u përball me Derbi Kauntin në Kupën e Ligës. "Djajtë e kuq" kaluan të parët në avantazh, por në fund pësuan përmbysjen e skuadrës së drejtuar nga Frenk Lampard, përpara se të barazonin në shtesë me Felainin. Por goditjet e penalltive dënuan vendësit dhe skuadra e kategorisë së dytë në Angli eliminoi gjigantët e Junajtid. Gjatë ndeshjes, Pogba, i cili ishte lënë pushim nga Murinjo, ndodhej në tribunën e "Old Trafford", së bashku me Pereirën dhe Shoun, gjithashtu jashtë grumbullimit. Qeshin dhe bëjnë shaka për minuta të tëra, gjatë të cilave francezi poston edhe një histori në "Instagram", ku të tre shfaqen duke qeshur. Një gjë e tillë nuk i pëlqeu trajnerit portugez, i cili e akuzoi përpara kamerave në stërvitjen e nesërme kampionin e botës, se kishte postuar një video të
tillë, ndërkohë që skuadra ishte duke humbur dhe e quajti një sjellje pak të respektueshme dhe joprofesionale. Por tani, Andreas Pereira hedh dritë mbi të vërtetat e asaj përplasjeje. "Pol e postoi videon përpara, kur ishim duke fituar 1-0. Pastaj humbëm dhe të gjithë thanë se ishte postuar pas ndeshjes, por nuk është kështu", sqaroi mesfushori gjatë një interviste për "UOL Esporte". "Trajneri mendoi se Pogba e kishte hedhur atë video më vonë dhe i kërkoi përse kishte ndodhur diçka e tillë. Për fat të keq, ndodhi kështu dhe nuk mund të bëjmë asgjë".