Kukësi përmbysje me zemër, Teuta “shkërmoq” Laçin
Latif Amadu bën liderin te durrsakët, kurbinasit bien pas 9 javësh
Fati ndihmon më të mirin. Kjo është një frazë që shpesh u shërben skuadrave "të mëdha" për të justifikuar fitoret e vështira ndaj atyre më të "vogla" në letër. E tillë mund të përkthehet edhe fitorja e Kukësit dje. Përmbysje e vuajtur dhe një ndeshje e vendosur mes episodesh. Vendësit nuk shfrytëzuan as avantazhin e gjetur shpejt, as gabimin e Frashërit në fund të pjesës së parë dhe as penalltinë e shkaktuar prej gardianit të Kukësit, në fund një gol i ish-it Shameti dhe i Melos e nxjerrin ekipin e Cungut me tri pikë. Loja nuk mjafton dhe për këtë, trajneri i Kastriotit Elvis Plori deklaroi dorëheqjen, këtë herë të parevokueshme.
Avantazhi - Kastrioti është i vendosur mirë në fushë dhe agresiv, sidomos në mesfushë. Lojë me kombinime të shumta dhe të shpejta, që nxjerrin Kukësin nga "automatizmat" e vet. Terreni i rënduar favorizon vendësit, për vetë lojën e ashpër dhe lojën me pasime të gjata. Në të 21-tën minutë, Bardhi është i mrekullueshëm me galopimin në të majtë të zonës, duke rrëmbyer me vete vëmendjen e katër mbrojtësve. Jo vetëm kaq, por në një kënd të pamundur, kthen drejt qendrës një top për Roxherin, i cili i vetëm s'e ka shumë të vështirë të shënojë. I huazuar te krutanët, goli i realizuar prej tij rikthen edhe një herë në vëmendje te verilindorët vendimin për ta huazuar.
Agresiviteti - Pjesa e mbetur e pjesës së parë flet për krutanët. Lojë agresive në mesfushë, brenda kufijve sportivë, që e vendos Kukësin në vështirësi të madhe. Treshja Roxher, Henri dhe Bardhi vë shpesh në rrezik prapavijën e Kukësit me kombinime të sakta dhe të shpejta. Në fundin e pjesës së parë, një gabim i Frashërit pas kthimit të topit nga Cuculi nuk shfrytëzohet për të dyfishuar rezultatin. Është Mziu në hyrje të zonës që heziton në goditje, me gjithë portën thuajse të boshatisur. Aksionin pasardhës është Bardhi e Henri që kombinojnë me kokë, por Frashëri bllokon.
Penalltia - Në minutën e 53- të të ndeshjes, vendësit shpërdorojnë sërish. Bardhi vë nën presion Frashërin që gabon me këmbë, duke dhuruar topin dhe pasi sulmuesi nis driblimin e tij, pengohet nga portieri i Kukësit dhe kryesori Klajdi Kuka akordon penallti. Asnjë kontestim.
Para Frashërit, heroi i krutanëve. Mund të bënte verilindorët me dhimbje koke, por gjuajtja tokazi kuptohet nga Stivi Frashëri, që shlyen çdo gabim dhe mban Kukësin në lojë. E teksa aksioni pasardhës është momenti i keqardhjes për vendësit, Kukësi nuk ka
kohë për të humbur. Aksion drejt portës kundërshtare, topi në qendër të zonës dhe kapiteni Shameti i saktë me kokë, barazon shifrat. Festë poshtë tribunës nga ish- i i krutanëve.
Përmbysja - Kastrioti nuk dorëzohet. Herë me aksione
të rrezikshme e herë me vonesa loje, ia del që të nervozojë Kukësin. Krosim i mirë për Roxherin nga Bardhi, por këtë herë fati është kundër. Gjuajtja me kokë përplaset në shtyllë, teksa kronometrohej e 74-ta minutë. 120 sekonda më vonë, është Dzaria që humb
mundësi shënimi para portës. Në minutën e 84- t, Kukësi shënon golin e përmbysjes. Është Melo që merr një top në hyrje të zonës, gjen hapësirën e goditjes dhe shënon, Kukësi përmbys dhe shfrytëzon vonesat e lojës deri në fund, për të dalë me tri pikë nga stadiumi
i Fushë-Krujës, "Redi Maloku". Keqardhje për Kastriotin që nuk i mjaftoi as loja, as episodet dhe Kukësi e fati arritën t'i mposhtin. Pas humbjes me një ndeshje mjaft të mirë, trajneri Plori dha dorëheqjen e parevokueshme nga Kastrioti.