“Arbitri mund të kursehej me Xhixhën”
Artan Mërgjyshi mendon se ndeshja do të shkonte krejt ndryshe nëse nuk do të mbeteshin me 10 lojtarë për 87 minuta. Ai mundohet që të zhdramatizojë humbjen, ndërsa për “SuperSport” theksoi se arbitri mund ta kalonte me një të verdhë atë ndërhyrje të Xhixhës ndaj Kallakut. “Mungesa e inferioritet numerik ishte një nga arsyet që solli humbjen. Morëm një goditje psikologjike. Ai karton na goditi shumë. Përveç kartonit morëm dhe atë gol që erdhi prej mospërqendrimit tonë. Këto na dëmtuan. Skuadra u mundua të reagonte. Krijuam aksione pozitive, nuk patëm përfundim. Në momentin që po zhvillonim lojë, morën golin e dytë që na dërrmoi. Në pjesën e dytë nuk kishim fuqi për të reaguar edhe pse bëra zëvendësime. Nuk duhet ta bëjmë dramë këtë humbje. Gjërat nuk shkuan në favorin tonë dhe i kishim episodet kundra. Ne kemi forca dhe energji dhe sot (dje) ndikoi edhe dëmtimi i Toros. Po ashtu edhe Lushkja nuk ishte në formë, Xhixha na ndëshkoi. Ne kemi forca dhe duhet të dalim nga kjo gjendje dhe ta kalojmë, pasi kemi pikë mjaftueshëm dhe jemi aty ku duhet të ishim. Kam thënë që nuk dua të merrem dhe nuk do të merrem me gjyqtarët. Ishte një faull në limitet e kartonit të verdhë me të kuq, por ishte vetëm fillimi i ndeshjes. Nuk mund të them se ishte gabim i gjyqtarit, por ishte gabim i futbollistit. Megjithatë, arbitri e di më mirë dhe mund ta kalonte me një të verdhë. Unë e preka edhe vetë që ishim në superioritet në mbrojtje, por ishim shumë statik dhe përveç gabimeve ishte goditja psikologjike. Vrapuam shumë në minutat e para, por nuk ishim efikasë aty ku duhet”, u shpreh trajneri i Laçit pas ndeshjes.