Alarmi, gjysma e Superiores në fusha asnjanëse

Vetëm 50 tifozë në “Elbasan Arena”, në një ndeshje ku luante skuadra që renditej në vend të tretë (Laçi) dhe Teuta që pozicionohej e gjashta. Çfarë po ndodh me Superioren dhe pse tifozët e kanë bojkotuar në maksimum shumicën e skuadrave?! Janë të shumta arsyet, por përveç besimit të munguar për një futboll të pastër, tashmë tifozët po largohen gjithnjë edhe më shumë nga stadiumet për faktin se gjysma e skuadrave po luajnë në fusha asnjanëse. Laçi ishte pritës në Elbasan për shkak se fusha e vet po i nënshtrohet një rikonstruksioni. Kësisoj, kurbinasit për dy muaj janë të detyruar të degdisen sa në Elbasan, sa në Shkodër dhe ndoshta edhe në Fushë-Krujë. Por sikur të mos mjaftojnë problemet që kanë me stadiumet Kukësi, Kastrioti dhe Laçi, që aktualisht nuk luajnë në fushat e tyre, vjen edhe një lajm tjetër i keq. Tapeti i stadiumit “Redi Maloku” në Fushë-Krujë është bërë si mos më keq. Shqetësimin e ngriti dje trajneri i Kukësit, Armando Cungu. Kastrioti ka lënë Krujën dhe ka zbritur në Fushë-Krujë për shkak se stadiumi i vet nuk i plotëson kushtet, por tani që temperaturat pritet të ulen, një Zot e di se si do ta përballojë terrenin, që deri pak kohë më parë cilësohej si një nga më të mirët në vend. Por, surprizat nuk mbarojnë me kaq. Skuadrave që kanë probleme me fushat u shtohet edhe Teuta. Sipas asaj që konfirmojnë për “Panorama Sport” nga klubi durrsak, në tapetin e amortizuar të “Niko Dovanës” po hidhet një fare e re bari. Në këto kushte, edhe Teuta do të jetë e detyruar që për një muaj të luajë jashtë Durrësit. Një situatë e pabesueshme, për më tepër që jemi vetëm në fazën e parë. Gjithsesi, në FSHF duket se i kanë bërë llogaritë keq pa nisur sezoni. Disa fusha tashmë do të mbajnë një barrë të rëndë, duke filluar nga “Elbasan Arena”, që gjithashtu ka nevojë për ndërhyrje.