Mou: Asistenti u tregua i paedukatë
"Nuk jam zemëruar as me tifozët e Çelsit, edhe pse ata nuk më respektuan"
Një fund ndeshjeje i zjarrtë prej atij goli të vonë të Barklejt, i cili shmangu humbjen e parë të Sarrit në Premier dhe e futi me të drejtë italianin në historinë e klubit londinez. Në fakt, ai është trajneri i parë në historinë e klubit që nuk humbet një ndeshje në 8 javët e para të sezonit të debutimit. Një gol që e tërboi Murinjon, jo vetëm sepse barazimi e largoi nga kreu 9 pikë, por portugezi u zemërua nga provokimi i bashkëpunëtorit të Sarrit, Marko Iani. Në konferencën për shtyp, tekniku i Junajtid shfaqet i qetë: "Doni të dini se çfarë ndodhi në fund? Unë mund t'iu them se 97 minutat e ndeshjes ishin aq të bukura, sa ju doni të përqendroheni tek ajo? Unë nuk mora respektin e tifozëve të Çelsit në këmbim, por kjo nuk është përgjegjësia ime (i referohet ngritjes së tre gishtave). Ajo që unë bëra sot këtu do ta bëja edhe në Madrid, Milano dhe Porto. Reagimi i tifozëve nuk është diçka që e vendos unë. Nuk jam i zemëruar me asgjë. Për atë që ndodhi me asistentin e Sarrit, Mauricio ishte i pari që erdhi tek unë dhe më tha se do ta zgjidhte ai. Ndihmësi erdhi tek unë më pas dhe më kërkoi ndjesë. I thashë 'harroje, edhe unë kam bërë shumë gabime në karrierë në të shkuarën'.
Nuk është faji im, por i asistentit të Sarrit. Ai u tregua shumë i paedukatë, por Sarri e zgjidhi situatën. Ata më kërkuan të dy ndjesë dhe unë e pranova. Për mua, historia mbyllet këtu. Nuk e di emrin e tij dhe nuk dua ta di, por gjithçka është në rregull".
NDESHJA - Më pas, 55-
vjeçari komenton ndeshjen: "Ne ishim skuadra më e mirë në fushë. Përpara ndeshjes 1 pikë në ' Stamford Bridge' mund të thuhet se është një rezultat i mirë, sepse është shumë e vështirë të fitosh këtu, por pas ndeshjes dhe mënyrën sesi shkoi ajo, është një rezultat i tmerrshëm për ne
dhe fenomenal për ta. Ne ishim në lojë, kontrolluam Hazardin dhe Zhorzhinjon. Pas golit të dytë patëm raste për të shënuar edhe të tretin. Ishim skuadra më e mirë, ishim të qetë në kontrollin e topit". Nuk mungon as një shigjetë për kohën shtesë të akorduar nga Majk Din: "Shpresoj që çdo arbitër
të bëjë të njëjtën gjë si ai dhe të japë 6 minuta. Nuk e di nga dolën. Ne u përpoqëm gjithnjë të luanim dhe nuk pati shpenzim kohe. Jam i kënaqur me të gjithë lojtarët e mi përveç rezultatit. Ishte një ndeshje fantastike dhe rezultat shumë i pamerituar, por i tillë është futbolli".