Shtohen problemet për Shehin, Radas në dyshim ndaj Partizanit
Problemet për Orges Shehin në prag të ndeshjes së radhës në kampionat kundër Partizanit në transfertë nuk kanë fund, pasi listës së të dëmtuarve i është shtuar edhe Marko Radas. Pavarësisht fitores së regjistruar në fund të fazës së parë me Kamzën, që i çon në tre rezultatet pozitive për Skënderbeun, korçarët do të luajnë përballë Partizanit në transfertë delikate. Bëhet fjalë për një tjetër futbollist që i shtohet listës së dyshimeve në ndeshjen e radhës. Kapiteni Marko Radas duket se nuk është në gjendjen e tij më të mirë. Pas problemeve para ndeshjes me Kamzën, që e detyroi kapitenin të luante, pavarësisht dhimbjeve dhe problemeve, Marko Radas tashmë vuan edhe një goditje në brinjë që është shkak i asaj përplasjeje me Plakun në minutën e 6- të të takimit. Kjo goditje po jep dhimbje te kroati, që nuk dihet nëse do t'i kalojë deri ditën e hënë, kur luhet takimi me Partizanin. Një problem më shumë ky për Skënderbeun dhe trajnerin Shehi, që është bërë me "dhimbje koke" në javën përgatitore për kryendeshjen e startit të fazës së dytë. Nuk është vetëm gjendja e Radasit që shqetëson stafin teknik. Dilemat shoqërojnë edhe Blerim Krasniqin me Gjergji Muzakën, pasi të dy kanë qenë me probleme fizike. Krasniqi u la pushim nga Shehi ndaj Kamzës, sepse nuk ishte në gjendje fizike për të qenë në këtë takim, ndërsa Muzaka është dëmtuar pikërisht ndaj kamazalinjve, në mesin e pjesës së parë. Nëse Krasniqi është në rikuperim e sipër, ende nuk dihet nëse Muzaka do të jetë gati për sfidën me ish-skuadrën. Për mesfushorin mendohet një kontraktim në pjesën e pasme të kofshës, por nuk dihet me saktësi se sa i rëndë është ky kontraktim. Burime pranë stafit mjekësor bëjnë me dije se do të bëhet e pamundura për të rikuperuar të tre futbollistët deri në fund të javës kur do të luhet ndeshja me Partizanin. Ll. Saro