Gola dhe penallti të paqena, java e gafave për arbitrat
11-metërshi i Bruno Telushit duhej goditur sërish
Penallti e dhënë jash të zonës në Korçë, gol që duhej anuluar për Partizanin dhe dy kartonë të kuq që mungojnë për gjeste antisportive. Java që mbylli fazën e parë nxori në pah gafat e disa arbitrave, veçanërisht të Kreshnik Cjapit në Partizani-Luftëtari 2-1, si dhe Indrit Myrtjes në Skënderbeu- Kamza 2- 0. Jo pas për gabime të pafalshme mbetet Laver Alla, i cili fali një shkelm të Grecës ndaj Siljanovskit.
PARTIZANI-LUFTËTARI 2-1 Gjyqtarë: K.Cjapi, O.Grabova (Fier), M.Shazivari (Tiranë); Ky takim u gjykua nga Kreshnik Cjapi i kolegjiumit të Fierit, me ndihmës Orgest Grabovën dhe Mario Shazivarin. Janë katër raste për moviolë, që nëse veprohej ndryshe, mund të kishte tjetër rezultat.
21' Asani nga këndi e lëshon topin në zonën mike. Portieri Ruçi nuk e largon si duhet topin, pasi Bardhi i vendos dorën e majtë në trup. Gjirokastritët me të drejtë protestojnë tek arbitri, por Cjapi akordon gol, duke gabuar. Goli duhej anuluar për faull ndaj Ruçit.
50' Arbitri i mohon një penallti Partizanit. Topi i gjuajtur nga Bardhi në të djathtë ndalet brenda zonës nga dora e hapur mbrojtësit Rustem Hoxha. Këtu gabon edhe anësori Grabova, që nuk sinjalizon.
54' Mala nga e majta hyn në zonë, por Liçaj ndërhyn me bërryl dhe e rrëzon. Gjyqtari vepron drejt, duke akorduar penallti për të kuqtë, por gabon duke mos e ndëshkuar me të verdhë mbrojtësin e Luftëtarit, i cili dilte automatikisht me të kuq, pasi e kishte një të verdhë.
55' Telushi shënon nga pika e bardhë e penalltisë, por goditja duhej përsëritur, pasi disa lojtarë u futën brenda zonës përpara gjuajtjes së vlonjatit.
LAÇI-TEUTA 0-3
Gjyqtarë: E.Jorgji (kryesor), D.Rexha, R.Avdo (anësor)/ J.Xhaja, K.Meta (pas portave);
FSHF- ja i kishte bërë vlerësim maksimal ndeshjes Laçi-Teuta, që u luajt në fushën asnjanëse të Elbasanit. Përveç Enea Jorgjit si kryesor me stemën e FIFA- s, edhe anësorët ishin ndërkombëtarë, pikërisht Rejdi Avdo dhe Denis Rexha. I vetmi rast për moviolë ishte ai i
minutës së 3-të, kur Xhixha bëri një ndërhyrje horror me takat ngritur ndaj Kallakut në mesfushë. Jorgji e ndëshkoi menjëherë me të kuq, duke marrë një vendim të drejtë. FLAMURTARI-TIRANA 1-0 Gjyqtarë: L.Alla (Lushnjë), R.Çokaj (Lezhë), E.Malo (Lushnjë); Laver Alla gaboi vetëm në një rast gjatë ndeshjes në Vlorë. Ai e nxori nga xhepi plot gjashtë herë kartonin e verdhë, katër herë për lojtarët e Flamurtarit, Pollozhani, Alvesh, Torasa dhe Siljanovski, si dhe dy herë për ata të Tiranës, Turtulli dhe
Imami. I vetmi moment për moviolë ishte ai i minutës së 62-të, kur mbrojtësi i djathtë i Flamurtarit, Siljanovski, u godit me takë pas kokës nga Greca. Ky moment kaloi pa ndëshkim, me kryesorin gaboi, pasi nëse do ta kishte vlerësuar drejt rastin, në bashkëpunim me anësorin, do jepte direkt të kuqin për Grecën. SKËNDERBEU-KAMZA 2-0 Gjyqtarë: I.Myrtja, M.Dervishi, F.Thorja (Shkodër); Një ndeshje që prodhoi disa raste për moviolë. Më flagranti ishte ai i minutës së 16-
të, kur kryesori Indrit Myrtja dha një penallti totalisht të paqenë. Edhe pse ndërhyrja e Radasit ndaj Zisit ishte e parregullt, duhej akorduar goditje dënimi jashtë zonës, por jo 11-metërsh. Kontakti ishte jashtë zone dhe kjo duket qartazi nga pamjet filmike. Në këtë moment, Myrtja nuk ndihmohet as nga anësori Thorrja.
Një tjetër moment është ai i minutës së 61-të, kur në një dyluftim Teqja godet Demten. Arbitri e sheh, por e kalon vetëm me karton të verdhë, në një kohë që është në limitin e të kuqit. Në të 84-ën "falet"
edhe Vangjeli pas një bërryli që i jep Martinenës. Ky episod pati vetëm goditje dënimi, por jo karton të verdhë për mbrojtësin. KASTRIOTI-KUKËSI 1-2 Gjyqtarë: K.Kola (Tiranë), R.Preça (Elbasan), P.Simoni (Lezhë); Gjyqtari Klajdi Kola ka akorduar penallti të drejtë në favor të Kastriotit, në momentin kur Bardhi i rrëmben topin portierit Frashëri dhe pasi e driblon, ky i fundit e pengon me këmbën e djathtë. Një rast ku kryesori Kola pati edhe ndihmën e asistentit Simoni.