U-19 për mrekullinë në Champions, trajneri: Ia dalim me tifozët
Sot 17:00/ Goli në Kazakistan mban ende në lojë Vllazninë
Një humbje që mund të përmbyset dhe një gol që mban me shpresë. E tillë është situata që kërkon të shfrytëzojë Vllaznia ndaj Astanës në ndeshjen e kthimit për "UEFA Youth League". Përballja e parë në Kazakistan ka përfunduar 3-1, por shkodranët janë optimistë se me ndihmën e tifozërisë, gjithçka mund të përmbyset sot në orën 17:00 për kualifikimin në Championsin e të rinjve. Optimizmi përçohet nga treshja drejtuese, trajneri Luan Zmijani, drejtori i akademisë, Qashif Hoxha dhe ai sportiv, Alban Hasani.
Trajneri Zmijani - "Jemi plotësisht të gatshëm për këtë takim. Kemi dy mungesa, kartoni i kuq dhe dëmtimi i Hoxhës, por kjo nuk na pengon që ndaj këtij kundërshtari të fortë ne të
bëjmë më të mirën për të arritur objektivin që kemi, kualifikimin. Ne do të kërkojmë që në fillim me forca të shumta dhe do të mundohemi ta dëmtojmë kundërshtarin, por duhet të bëjmë kujdes. Në takimin e parë jemi ndëshkuar shumë shpejt nga një 11-metërsh, pastaj kemi goditur shtyllën ku mund të barazonim, por
nuk ia dolëm dhe pësuam edhe dy herë të tjera. Ky gol dhe një shtyllë na dhanë mundësinë që të shpresojmë për kualifikimin. Por, edhe gjendja e mirë e portierit Qarri na ka bërë të jemi sërish në lojë. Me ndihmën e të gjithëve dhe të tifozëve mund t'ia dalim", deklaroi trajneri Zmijani në një konferencë për shtyp.
Hoxha - Drejtori i akademisë Vllaznia, Qashif Hoxha, ka folur më së shumti për anën organizative. "Nga ana jonë janë marrë të gjitha masat organizative për zhvillimin e kësaj ndeshjeje dhe besoj se gjithçka është gati. Unë gjej rastin të ftoj gjithë tifozët shkodranë, por edhe bashkëmoshatarët e këtyre djemve që do të luajnë, të jenë në shkallët e stadiumit 'Loro Boriçi' për t'i mbështetur. Rezultati i ndeshjes së parë na lë shpresa për kualifikim dhe nëse do ta arrinim, do të ishte diçka historike. Ne besojmë te këta djem", u shpreh Hoxha. Hasani - Nga ana e tij, drejtori sportiv i akademisë Vllaznia, Alban Hasani, është shprehur: "Gjithçka është e hapur në këtë ndeshje. Goli i shënuar në fund të takimit të parë na jep të drejtën që të shpresojmë, si dhe kësaj here e njohim më mirë kundërshtarin. Do të kemi një takim të vështirë, pasi na duhet që të shënojmë, por nuk e shikoj si të pamundur arritjen e kualifikimit", ka përmbyllur drejtori i akademisë, Hasani. A.Uruçi