Ngec Dortmundi, Bajerni fiton dhe afrohet në -2 pikë
Golat e Goreckës dhe Tiagos u japin trepikëshin kampionëve
Bajerni merr fitoren e dytë radhazi ndaj Maincit në transfertë, duke u ngjitur në vendin e dytë të renditjes. Skuadra e Niko Kovaç tani duket se ka kaluar përfundimisht krizën, duke u rikthyer te fitorja. Është e treta radhazi së bashku me atë të arritur në fushën e AEK-ut në mesjavë për Champions. Ndaj Maincit, bavarezët treguan edhe njëherë forcën e tyre, duke triumfuar me rezultatin 1-2 me golat e Goreckës dhe Tiagos.
PJESA E PARË - Bajerni nis mirë lojën dhe që në fillim të saj ushtron një presing të madh te kundërshtari, i cili detyrohet të tërhiqet prapa. Serge Gnabri është i rrezikshëm në krahun e majtë dhe që në minutën e 13-të kroson bukur në zonë për Levandovskin që gabon në goditje. Më pas është David Alaba që godet nga jashtë zone, por topi kalon sipër traut të portës së portierit Myler. Në të 27-ën është Joshua Kimish që godet fort dhe topi përplaset në shtyllë. Goli i parë vjen në minutën e 39-të, Joshua Kimish shërben saktë për Leon Goreckën që godet nga fare pranë, duke dërguar topin në rrjetë. Bajerni tani ka nën kontroll ndeshjen, duke e dominuar totalisht atë. Vendësit duken të pafuqishëm ndaj skuadrës së Kovaçit, e cila tregohet është shumë e fortë për ta. Pjesa e parë përfundon 0-1 në favor të bavarezëve.
PJESA E DYTË - 45 minutat e dyta fillojnë menjëherë me gol nga vendësit, të cilët kapin në befasi skuadrën e Bajernit. Daniel Brosinski jep një top në zonë për Boetius që dërgon topin në rrjetë në minutën e 48të. "Opel Arena" shpërthen në festë. Por, bavarezët nuk demoralizohen dhe vazhdojnë sulmet e tyre në drejtim të portës. Kovaç vendos të fusë në lojë Frank Riberinë në vend të Serge Gnabrit që ka harxhuar shumë energji. Francezi shfaqet menjëherë i rrezikshëm në krahun e majtë. Goli i avantazhit nuk vonon për Bajernin që në minutën e 62-të e gjen atë me anë të Tiagos. Spanjolli shërbehet nga Robert Levandovski që jep një asist në brendësi të zonës. 1-2 për bavarezët, të cilët shpërblehen për lojën e tyre. Vendësit përpiqen të reagojnë dhe në minutën e 74-t Daniel Borinski tenton të godasë nga brenda zonës, por topi i tij bllokohet në momentet e fundit nga mbrojtja mike. Një minutë më pas është Sançez që shfaqet rrezikshëm në portën e Mylerit. Në të 78-ën Martinez provon
sërish për Bajernin, po spanjolli është i pasaktë. Katër minutat shtesë nuk sjellin asnjë ndryshim dhe Bajerni arrin fitoren e dytë rresht, duke u ngjitur në vendin e dytë vetëm dy pikë pas Borusias së Dortmundit që ndodhet në vendin e parë.