Nga sherri në fushë te kaosi në tunel, ja çfarë ndodhi në Vlorë
Shkëmbi u fut në fushë, ndërsa Daja u tërbua me veprimin e kolegut
Rikthehet tensioni në Vlorë. Hedhja e bidonëve në fushë nuk ishte asgjë pas rrëmujës dhe kaosit që pasoi minuta më vonë. Acarimi fillimisht erdhi pas një faulli në mesfushë në minutën e 72- të. Trajneri Bledi Shkëmbi futet në fushë, ndërsa në këtë moment Ilir Daja shkon te pankina e Skënderbeut i revoltuar, debaton me korçarin. Gjeorgjevski ishte shtrirë në fushë pas përplasjes me Bathën, ndërsa Shkëmbi afrohet dhe tenton të diskutojë me gjyqtarin. Më pas është Pollozhani që sqarohet me Gjeorgjevskin, ndërsa ky i fundit thirret nga Hamiti që të ballafaqohej me Bathën. Në këto momente tenton të shkojë pranë gjyqtarit dhe lojtarëve trajneri Daja, por pengohet nga Osmani. Gjithashtu është zv.trajneri i Teutës, Vrapi, që ndërhyn më pas, duke tërhequr prej fanelle Osmanin dhe tenton të flasë me Dajën. Ky i fundit më pas bisedon ashpër me Hamitin, i cili e këshillon të mos vijojë më tej, pasi do të penalizohej duke mos u lejuar në pankinë. Pak minuta më vonë, Daja vijon të jetë i revoltuar dhe debaton me arbitrin e katërt, Olsid Ferataj, ndërkohë që tribunat ishin ndezur.
GOLI I ANULUAR - Gjithçka agravohet edhe më shumë pas golit të anuluar të Torasës. Është fillimisht trajneri Shkëmbi që "provokon" tifozët e Flamurtarit, të cilët po festonin. Ai u kërkon të ndalen dhe të shikojnë që goli nuk ishte i rregullt. Lojtarët e të dyja skuadrave kapen me njëritjetrin dhe tifozët nisin të hedhin sërish bidonë në fushë. Pranë pankinës gjendet drejtori Ardi Behari, i cili debaton me anësorin Ferataj. Tifozët nisin me sharje dhe ofendime
ndaj gjyqtarëve dhe FSHF-së, ndërsa tentojnë të godasin me bidonë uji. Është trajneri Daja që ndërhyn. "Mos hidhni bidonë se do na dënojnë fushën. Iku, mbarojë tani çdo gjë", ka qenë thirrja e Dajës. NDËRHYRJA E IDRIZIT - Menjëherë pas ndeshjes, administratori i Flamurtarit, Sinan Idrizi, zbret në hollin e katit të parë të stadiumit dhe kërkon shefin e rendit të Policisë së Vlorës, Shpëtim Hasanaliaj. "Shpëtim, merrni në dorë situatën me forcat e policisë", thotë Idrizi. Por, në këtë moment dikush i thotë se trajneri Daja po debatonte me tifozët. "Ku është trajneri? Çfarë bën aty jashtë akoma ai?", është shprehur Idrizi dhe i është drejtuar fushës. Më pas, Idrizi rikthehet dhe kërkon që të
dalin të gjithë nga stadiumi, madje edhe mediat. "Ikni, pini ndonjë kafe", ishte batuta e administratorit. Gazetarët insistuan të mos dilnin, ndërsa personat e tjerë u larguan nga ky ambient. Dhomat e zhveshjes së ekipeve dhe arbitrave u vendosën nën kontrollin e Policisë së Shtetit dhe asaj private. Të parët që dolën nga stadiumi ishin delegati Millan Baçi dhe vëzhguesi Ilirian Kristo. Edhe këta shoqëroheshin nga policia, ndërsa në dalje të stadiumit nuk mungoi reagimi i tifozëve: "Dolën spiunët e SHIKU- t". Pas 25 minutash kanë dalë gjyqtarët me në krye Hamitin. Ishte vetë Idrizi, i cili kërkoi nga policia që të shoqëronin arbitrat. E.Sika