Besa kap kreun, bie Egnatia
Rrogozhinasit futen në krizë, Canka&Co humbasin shumë raste përpara portës
Tri pikë të çmuara për Besën, të fituara tri minuta para limitit të mbylljes së 90 minutave të kohës së rregullt. Një gol me shumë "peshë" nga kapiteni i verdhezinjve, Meglid Mihani, që i jep fitoren skuadrës në transfertën e Rrogozhinës përballë Egnatias. Me këtë 3pikësh, Besa ngjitet në vendin e parë në klasifikim. Por, edhe "qajnë" për dy të kuqet e dhëna për dy prej lojtarëve më të mirë të formacionit verdhezi, "regjisorit" Mihani dhe qendërsulmuesit Çekiçi. NDESHJA
Në 25 minutat e para janë vendësit që zotërojnë epërsinë territoriale. Madje, në minutat 5, 22 dhe 25 janë tri paralajmërime të rrezikshme për golin me të njëjtin autor, Cankën. Pritjet e Mirakës në dy rastet e para dhe trau i sipërm i portës në momentin e tretë ndalën golin e Egnatias. Besa u kundërpërgjigj me një aksion të Diksonit, që nga afër portës me kokë në të 12ën sa nuk shënoi. Mesi i pjesës së parë sjell një "zbehje" të lojës nga të dyja ekipet. Për të kulmuar emocionet edhe një herë në 5 minutat e fundit. Besa pati dy raste në këtë hark kohor. Fillimisht, Onuh afër portës vonon në gjuajtje, ndërsa më pas Çelhaka detyron portierin Haremi të grushtojë me
vështirësi. Në pjesën e dytë, Egnatia hyn me tjetër motiv në fushë. Ibrahimllari që në aksionin e parë paralajmëron golin teksa gjuan nga 8-9 metra, por pak mbi shtyllë. Besa reagon dhe Çelhaka me portën e boshatisur zgjedh një kënd të vështirë
për të shënuar, duke mos e shfrytëzuar këtë episod. Më tej do të nisë një presion i fortë nga Egnatia që për afro 10' (nga 50'-60') ndërton një serial aksionesh dhe godet disa herë rrezikshëm portën e Besës, por Miraka e natyrisht dhe mbrojtësit miq zmbrapsnin
me vështirësi rrezikun te porta kavajase. Pas minutës së 60-të, është Besa që sheh më shumë përpara. Zotëron mesfushën dhe sulmin me aktivizimin e 18vjeçarit të talentuar Tedi Cara, por dhe aftësitë e Albi Çekiçit. Në 87-ën, pogradecari i sulmit kavajas pengohet në zonë dhe për Sinën nuk ka asnjë mëdyshje, 11metërsh. Vetëm përvoja e kapitenit kavajas ka bërë që Haremi të mposhtet, edhe pse e kuptoi krahun, por nuk e ndaloi dot goditjen vrastare që u shkaktoi rrogozhinasve të parën humbje shtëpiake. Kavajasit fituan sepse paraqitën dukshëm një motivim të kënaqshëm. Ndoshta nuk qe ndeshja më e mirë e më perfekte në transfertë. Futbollistët e stafi ia dedikuan këtë fitore presidentit Nexhat Bizhdili, që të premten festoi ditëlindjen e tij të 55-të.