Gjoba te Mançester Junajtid përpara Evertonit
Një grup lojtarësh të Mançester Junajtid do të gjobiten nga klubi pas refuzimit të tyre për të marrë pjesë në një eveniment sponsorizimi ditën e premte. Disa prej yjeve të "djajve të kuq" refuzuan që të shfaqeshin në një takim me partnerët komercialë të klubit këtë fundjavë dhe e justifikuan mungesën e tyre me problemet me transportin publik, të cilat kanë shkaktuar probleme edhe me dy ndeshjet e fundit të Champions-it në "Old Trafford". Klubi u gjobit pasi Zhoze Murinjo mbeti i bllokuar në trafik dhe kjo solli shtyrjen e fillimit të ndeshjes kundër Valencias më 2 tetor. Pavarësisht se skuadra e zhvendosi takimin përpara ndeshjes kundër Juventusit këtë javë në hotelin në qendër të Mançesterit, më pak se gjysmë km nga stadiumi, sërish pati probleme me vonesën, çka solli edhe daljen e Zhoze Murinjos nga autobusi për ta vazhduar rrugën në këmbë. Trajneri kërkoi që
edhe lojtarët t'i bashkoheshin atij në këmbë, por siguria e refuzoi këtë gjë. Në fakt, portugezi mbërriti në "Old Trafford" përpara autobusit me futbollistët. Klubi është i zemëruar nga sjellja e futbollistëve që munguan në eventin e fundit të sponsorit të tyre dhe do t'u vendosë
atyre gjoba. "Sponsorët paguajnë shumë para dhe ky është një event që duhet marrë seriozisht. Mançester Junajtid ka një marrëdhënie fantastike me partnerët e biznesit dhe kjo nuk lë një shije të mirë", tha një burim i klubit për "DailyMail". Klubi është
shfajësuar edhe për vonesat e fundit në ndeshje, duke thënë se ato nuk erdhën për shkak të mungesës së organizimit nga ana e tyre. "DailyMail" kontaktoi me zyrën e shtypit të Junajtid për të marrë një reagim në lidhje me gjobat, por ata refuzuan që të komentonin.