Kovaç: Kjo është skuadra që dua, ishim në gjumë te goli

Trajneri i Bajernit, Niko Kovaç, ishte i kënaqur me lojën e skuadrës së tij në ndeshjen ndaj Maincit në transfertë. Skuadra e tij arriti të marrë fitoren e dytë radhazi në kampionat dhe të tretën në total, duke përfshirë edhe ndeshjen e Champions-it. Bajerni tregoi në Mainc se mund të fitojë edhe pse me disa ndryshime në formacionin e parë. Trajneri kishte lënë pushim Mats Humelsin, Arjen Roben, Hames Rodrigez dhe Frank Riberi. Në sulm përkrah Levandovskit luajti Tomas Myler dhe Serge Gnabri. Ky i fundit bëri një paraqitje dinjitoze në ndeshjen e Champions-it ndaj AEK- ut. "Nuk u shqetësova aspak, pasi kundërshtari na barazoi në fillim të pjesës së dytë. Ajo që nuk më pëlqeu ishte fakti që skuadra nuk bëri asgjë nga ato që u thanë në pushimin e pjesës së parë", u shpreh Kovaç në konferencën për shtyp pas ndeshjes në Mainc. "Jemi në gjumë sa herë që kundërshtari kroson në zonë, duke na e bërë jetën shumë të vështirë. Por, më pëlqen fakti që skuadra luan dhe arrin të krijojë shumë raste për shënim. Sot (dje) skuadra reagoi menjëherë, duke shënuar edhe golin e dytë. Kjo është ajo që kërkoj prej saj. Tani jemi në rrugën e duhur. Kjo fitore na jep shpresë për t'u ngjitur sa më shpejt në renditje edhe pse e kam thënë edhe më parë se kampionati është ende i gjatë", u shpreh Kovaç. Bajerni renditet në vendin e dytë me vetëm dy pikë pas Borusias së Dortmundit që nuk shkoi më shumë se një barazim 22 në shtëpi ndaj Hertës në ndeshjen e luajtur ditën e djeshme në "Signal Iduna Park". Bajerni luajti dy ndeshjet e fundit në transfertë, duke treguar një formë të mirë. Skuadra tani është rikthyer te fitorja pas dy humbjeve radhazi ndaj Hertës dhe Gladbahut.