Barça-Real, Lopetegui: Nuk e vras veten po humba
Reali kishte 9 Champions, ndërsa Barcelona 2
Ditën e sotme në “Kamp Nou”, në orën 16:15 do të luhet klasikja e parë në dhjetë vitet e fundit mes Barcelonës dhe Realit pa Leo Mesin dhe Kristiano Ronaldon. E fundit Barcelona-Real u luajt më 23 dhjetor të vitit 2007 dhe e fitoi Reali me rezultatin 0-1, falë golit të Hulio Baptistës. Që nga ajo kohë kanë ndryshuar shumë gjëra. Por si ishte futbolli në atë kohë dhe çfarë ndodhte me protagonistët e kësaj sfide. Gazeta spanjolle “Marca” na i kujton.
Kaka- Rikardo Kaka në atë kohë luante me Milanin dhe ishte lojtari më i mirë në botë. Ishte ai “mbreti” i këtij sporti, ndërsa Leo Mesi dhe Kristiano Ronaldo nuk kishin fituar ende asnjë “Top të Artë”.
Lopetegui- Trajneri aktual i Realit, Hulen Lopetegui, në atë kohë ishte shefi i vëzhguesve ndërkombëtarë të Realit me Ramon Kalderonin. Një vit më vonë mori drejtimin e Katijas.
Valverde- Trajneri i Barcelonës, Ernesto Valverde, në atë kohë ishte trajner i Espanjolit dhe e mbylli sezonin në vendin e 12- të. Ndërsa në vitin e ardhshëm arriti në finalen e Kupës UEFA.
Champions- Përpara se në Madrid dhe në Barcelonë të zbarkonin dy jashtëtokësorët Ronaldo dhe Mesi, Reali i Madridit kishte fituar 9 Champions, ndërsa Barcelona 2. 11 vite më vonë, situata ka ndryshuar. Reali ka 13, ndërsa katalanasit kanë fituar 5 Champions.
Spanja- Në atë kohë, as kombëtarja spanjolle nuk ishte kaq e lavdishme sa sot. Kishte fituar vetëm një kampionat Europian në vitin 1964. Më vonë arriti të fitonte 2 Europianë të tjerë në vitet 2008, 2012 dhe një Botëror në vitin 2010.
Goleadori- Ishte Hulio Baptista lojtari vendimtar i ndeshjes, i cili i dha triumfin Realit 0- 1 në El Clasicon e luajtur më 23 dhjetor të vitit 2007.
Trajnerët- Në atë kohë, ata që drejtonin dy skuadrat ishin Bernd Shuster dhe Frank Rajkard. Njëri i Realit dhe tjetri i Barcelonës. Sot, gjermani është në Kinë dhe holandezi nuk është më trajner.
Presidentët- Hoan Laporta dhe Ramon Kalderon ishin ata që “komandonin” dy skuadrat në zyra. Të dy presidentët e fundit kur një “El
Clasico” u luajt pa Mesin dhe Ronaldon.
Vinicius- Vinicius Xhunior ishte 7 vjeç dhe luante futboll salle me Sao Gonçalon. Më kurioz është fakti që, ai i cili konsiderohet si e ardhmja e futbollit brazilian, në atë kohë luante si mbrojtës.
Golashënues- Golashënuesi i kampionatit në atë kohë ishte Dani Guiza. Arriti të shënonte 27 gola për skuadrën e Majorkës. Pastaj dihet se kush e bënte ligjin në La Liga, kur filluan të rivalizonin njëri-tjetrin, Kristiano Ronaldo dhe Leo Mesi.