Solari “shënon” 4 gola për Realin, Barça kursehet
Kundër Melijës kupë, hipotekohet bileta në 1/8-at që në vajtje
Melija është një en klavë spanjolle në veri të Marokut. Një vend prej vetëm 12.1 kilometrash katrorë (86 mijë banorë), ku tensionet dhe hakmarrjet kanë shkruar historinë, por në të njëjtën kohë një tokë që të kujton ditët e ripushtimit. Stadiumi "Alvarez Claro", i cili pati nevojë për montimin e tribunave provizore për eventin e madh (pa llogaritur tarracat e shtëpive të "shitura" të gjitha) është një purgator dantesk për Realin e Madridit, kampionin e trefishtë në fuqi të Europës, në kërkim të vetvetes pas humbjes 5-1 në Klasiken kundër Barçës. Nis nga këtu, nën reshjet e shiut, aventura e Santiago Solarit në stolin e "Los Blancos", ndeshje e vlefshme për 1/16-at e Kupës së Mbretit. Një debutim sigurisht josfidues, përballë një kundërshtari që mban vendin e dytë në Grupin VI të Segunda B, kategoria e tretë në Spanjë.
Drithërima dhe rrotacion - Soari zgjedh skemën 4-2-3-1 dhe hedh në fushë një Real Madrid plot me përforcime. Djemtë e Luis Migel Karrion, të duartrokitur edhe kur e dërgonin topin në tribunë, trembin mbretërorët në dy raste: Igor Martinez, me një të shkuar në La Liga, 13 ndeshje me Atletik Bilbaon, prezantohet dy herë i vetëm përballë Kejlor Navasit në lindje dhe perëndim të pjesës së parë. Këmbët i dridhen dhe dy goditjet e tij përfundojnë jashtë, por fotografojnë defektet e mbrojtjes madrilene.
Praktikë e mbyllur - Mes këtyre drithërimash, Reali e mbyll ndeshjen: zhbllokon Benzema në 28', duke goditur në zonën e boshatisur të Melijas pas asistit nga e djathtë të Odriozolës. Dyfishon në shtesën e pjesës së parë Asensio, me një të majtë të bukur pas asistit të Vinisius, shumë aktiv, por edhe i pafat kur shkund traversën në pjesën e dytë, gjatë së cilës Solari nis rrotacionin, duke menduar për ndeshjen kundër Vajadolidit. Në fund, Odriozola finalizon pas rrëmujës në zonë, përpara "poker"-it në shtesë që firmoset nga Gonzalez, i cili hipotekon kualifikimin në 1/8-at që në ndeshjen e vajtjes, në pritje të sfidës së kthimit në "Bernabeu" në program për t'u luajtur më 5 dhjetor. Kush e di nëse Solari ose kush tjetër për të, do të ketë gjetur deri atëherë identitetin e humbur të kësaj skuadre.