Banderola raciste, FSHF dënon Partizanin
Mungojnë tifozët me Kamzën, ndaj Laçit në dorë të... klubit
Partizani ia hedh me vetëm dy ndeshje pa tifozë pas incidenteve në sfidën e fundit ndaj Skënderbeut. Komisioni i Disiplinës iu referua nenit 66 të Kodit të Disiplinës Sportive në lidhje me parullën raciste të shfaqur në sektorin e tifozëve të kuq, ku shkruhej: "Një grek më pak, një bastard më pak". Në publikimin e vendimit në faqen zyrtare të FSHF-së, ndër të tjera shkruhej: "Partizani, për sjellje të gabuar të spektatorëve, duke hedhur sende të forta brenda rrethimit të fushës së lojës dhe për paraqitje të parullave fyese dhe raciste, në bazë të nenit 66/ 3/a të KDS, dënohet me zhvillimin e 2 ndeshjeve pa spektatorë në fushën përkatëse". Ndërkohë, në bazë të kalendarit për javën e 11të, Partizani pret Kamzën dhe ky takim do të luhet pa spektatorë të shtunën në orën 17:00 në stadiumin "Selman Stërmasi". Të kuqtë e shlyejnë dënimin në javën e 13-të, kur presin Laçin. Mirëpo, klubit i lind e drejta që pas shlyerjes së një ndeshjeje të konvertojë dënimin me gjobë, që shkon 5 milionë lekë të vjetër. Kësisoj, në sfidën ndaj Laçit është në dorë të klubit nëse do të paguajë për të pasur tifozët në stadium. Në sfidën kundër Skënderbeut më shumë jehonë bëri banderola kundër Greqisë, e cila ka qenë ndër më të komentuarat në shtetin helen.
NENI 66 - Ja çfarë parashikon neni 66/3/a të KDS që Disiplina iu referua për dënimin e Partizanit. "Sjellja e gabuar e tifozëve përfshin akte të dhunës ndaj personave ose objekteve, lëshimi ose hedhja e mjeteve ndezëse, përdorimi i dritave laser, përdorimi i dronëve, hedhja e fishekzjarrëve, paraqitja e parullave politike ose ofenduese të çfarëdolloj forme, shprehja e fjalëve ose zhurmave/ tingujve ofenduese ose hyrja në fushën e lojës. Në rastin e verifikimit të shkeljeve si më sipër ndaj personave juridikë, shoqatave dhe/ ose klubeve ku konsiderohen si mbështetës spektatorët kundërvajtës, do të jepen dënimet si më poshtë: a) në rastin e hedhjes së fishekzjarrëve, gurëve ose sendeve të tjera brenda rrethimit të fushës, pa shkaktuar akte të dhunës ose ndërprerje të lojës, sanksionohen me dënimin për të paktën 1 ndeshje pa spektatorë".